HEBRUTE 6
6
Pichin Lam Manoh Ni
1Huchi in Khrist thubulte gen nawn lou in pichin lam i manoh ding uh; thilhih sisate kisikna, Pathian lam a ginna, 2baptisma leh khutngak leh misi thohnawnna leh tangtawn vaihawmna lam thuhilhnate suangphum phum nawn lou in. 3Pathian in pha asakleh huai bang i hih ngei ding uhi.
Puksan Lauhuaina
4Khatvei hihvak a om khin a, van thilpiak chiamta, Kha Siangthou dong khin a, 5Pathian thuhoihna leh hun hong om ding a thilhihtheihnate chiam khin hinapi, 6ginna akihei mangsan ualeh huchibang mite zaw akisikna ding ua bawl thak theih ahi kei uhi; Pathian Tapa amau a ding a kilhlum tuan nawn a selphou ahih ziak un.
7Lou, atung ua vuahtui ke gige na dawn khin a, huai khohsak a ompa a dia nek theih anteh-louhing hon suah pen in Pathian vualzawlna atang hi. 8Himahleh loulingnei leh khaulingnei asuah nak in bel aphatuam kei a; hamsiat in a-om ding a, atawpna halmang ahi ding hi.
9Himahleh deihtakte aw, huchibang thu gen mah leng nou zaw huai thilte sang a hoihzaw hotdamna toh kizui thilte nei na hih uh ka muang uhi. 10Amin ziak a itna a nna na sep uleh misiangthoute nna na sepsak uh na latsak uh leh tutan a leng nasep lai uh mangngilh ding in Pathian mitak lou ahi kei hi. 11Himahleh atawp tan a lametna theihchetna kim mu ding in na thanop ngeingei bang un thanop suah gige chiat le uchin ka chi uhi. 12Huchi in na kithadahsak kei ding ua, ginna leh kuhkalna ziak a thuchiamte gouluah khin khawngte entonte na hi zaw ding uhi.
Pathian Thuchiam En In
13Pathian in Abraham kiang a thu achiam lai in, amah sang a thupizaw lou a akichiam theih louh ziak in, amah-le-amah kilou in akichiam hi. 14Taktak in ka hon vualzawl ngeingei ding a, hih leng ka hon hihpung ding chi in akichiamta hi. 15Huchi in kuhkaltak a athuakkhiak nung in, thilchiam amuta hi. 16Mihingte zaw asang ua thupizawte min lou in akichiam ua; akiselna chiteng uah leng hihkipna ding in kichiam tuh thutawp ahi. 17Huchi in Pathian in athiltup hihlamdan tuan theihlouhdan nakpi mahmah a theihsak ut in thuchiam gouluah dingte kiang ah kichiamna apalaisak hi. 18Pathian thugen zuauthei vual ahihlouhna ah thil kikhek lamdang thei lou nihte ziak in, i ma a lametna koih lenkip ding a bitna ding a amah delhte'n hanthawnna thupitak i neihtheihna ding in ahi. 19Huai lametna hinna sikkip in i nei ua, muanhuai leh kiptak ahi, huai lametna puanzak sung ah leng alutta hi. 20I ma a na paita Jesu, mun siangthoupen ah i makaipa a alut tak man in Melkizedek omdan bang in eite a ding in tangtawn a siampu lianpen ana hita hi.
Currently Selected:
HEBRUTE 6: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
