HEBRUTE 5
5
Siampu lian Nasep
1Siampu Lianpen peuhmah mihingte sik-le-tang akhelhnate ziak a thilpiak leh kithoihnate Pathian kiang a lankhawm ding a mihing lak a kipan telkhiak leh mihingte a dia Pathian seh ahi uhi. 2Huaite'n amau ngei leng hatlouhna a tuam a om sam ahih ziak un, bangmah theiloute leh lamhaihte tung ah zahngaihna anei thei uhi. 3Huaiziaktak in mite a ding a alatsak bang un, amau a ding ngei leng khelhnate ziak in lan lou thei lou ahi uhi. 4Huan huai pahtawina Aaron bang a Pathian sap ahih ngal kei uleh kuamah amau akipe ngei kei uhi.
5Huchibang in Khrist leng siampu lianpen a bawl ding in amah akihih thupi kei a,
“Nang zaw ka Tapa na hi a,
tuni in ka hon neikhia hi,”
chi a akiang a genpa'n ahih thupizawta hi.
6Mun dang a agen bang in;
“Nang zaw, Melkizedek omdan bang a tangtawn siampu na hi,” achi hi.
7Ama'n sa aput lai nite in, sihna lak a amah hondam theipa kiang ah nakpitak a kikou leh khitui ke kawm in thumnate leh ngetnate alan a, akihtakdan asiam zel ziak in ngaihkhiak in a-om hi. 8Tapa hilhial himahleh athilthuakte ah thuman azil hi. 9Huchi in hihbukim a hong om in, athumang peuhmahte a ding in tangtawn a hotdamna bulpi ahong hita hi. 10Melkizedek omdan bang a siampu lianpen in Pathian in abawlta hi.
Ginna Tawpsan Lou Dia Thuhilhna
11Huai mi tanchin ahihleh gen ding tampi i nei ua, genchet leng ahaksa; na bil uh angon tak ziak in. 12Ahun thu ngaihtuah in zaw heutu hi khinta hial le uchin kilawm hiven, Pathian thubulte hilh kiphamoh nawn na hi ve ua, an gum hilou nawitui kiphamoh na hong hita uhi; 13nawitui ne peuhmah in diktatna thu ah theihna anei kei ua, naungek ahih ziak un. 14An gum piching a ding ahi, huaite'n azat gige ziak un sia-le-pha theichian ding in atheihtheihnate uh asin zongsangta uhi.
Currently Selected:
HEBRUTE 5: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
