HEBRUTE 4
4
Khrist Khawlna Taktak
1Huaiziak in i lau ding uh, huchi lou in zaw akhawlna a lutna thuchiam om lai napi, na lak ua kuapeuh ching lou in na om kha zenzen ding uh. 2Amau kiang a gen ahih bang in tanchinhoih i kiang ua gen ahi ngal a; himahleh athuzak uh amaute'n aphattuampih kei uh, azate toh ginna a akizom louh ziak un. 3Ei gingta khinte huai khawlna ah i lut lellel uhi,
“Ka thangpaihna a ka kichiam bang in ka khawlna ah alut kei hial ding uh,”
achih bang in;
leilung pian tung a kipan ama nnate sep zoh hita mahleh.
4Koi lai mun hiam ah ni sagih ni thu hichibang in agen hi: “Huan ani sagih ni in Pathian in anasep tengteng akhawlsanta,” chi in. 5Huan hiai mun ah, “Ka khawlna ah alut kei ding uh,” achi nawn hi. 6Huchi in ni dang a tanchinhoih za masate thuman louh ziak in lut kei mah le uh, khenkhatte huai khawlna a alutna ding ua thuchiam a-om lai ziak a lut lai ding a-om uhi. 7Hun sawttak nung in David ah ama a kigensa bang in bang ni hiam aseptuan nawn hi.
“Tuni a aw na zak chiang un na lungtang uh khauhsak kei un,” chi in.
8Joshua in amaute na khawlsakta hileh zaw, huai nung in ni tuam dang thu gen angai kei ding hi. 9Huchi in Pathian mite a ding in Sabbath khawlna a-om lai hi. 10Pathian in ama nasepte akhawlsan bang in, akhawlna a lut khinsa mi'n leng anasepte akhawlsan samta hi. 11Huchi in kuamah huai thumanlouhna bang a om a i puklouhna ding un huai khawlna a lut ding in phatuam i ngai ding uhi.
12Pathian thu ahing a, thil ahihthei a, namsau hiamtuah bangchibang sang in ahiam a, hinna leh kha, guhlawi leh guhngek tuamkhen hel khop in asun thei a, lungtang a ngaihtuah leh tupte athei pah thei hi. 13Huaiziak in thilsiam peuhmah ama mitmuh a lang lou himhim a-om kei; i tanchin tutna dingpa mitmuh ah bangkim vuaktang leh kihongsa ahi.
Khrist I Siampu Lianpen
14Hichi in van munte a paisuak khinsa siampu lianpen thupitak, Jesu Pathian Tapa, i neih ziak in i thugin i pomkip ding uhi. 15Siampu Lianpen i hat louh kitheihnate hon theihpih pha lou nei i hi kei ua; eimah bang a lam tuamtuam a khemna tuaksa, khelh bel khial lou, nei i hi zaw uhi. 16Huchi in zahngaihna i muhtheihna ding leh huh i poimoh chiang a huhna hehpihna i ngah theihna ding in, hehpihna laltutphah hangtak in i naih ding uhi.
Currently Selected:
HEBRUTE 4: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
