HEBRUTE 3
3
Mosi Sang A Heutu Thupizaw
1Huchi in unau siangthou, van sapna tanpihte aw, i thugin toh kisai a Sawltak leh Siampu Lian, Jesu ngaihtuah un; 2Pathian inkuante tengteng lak a Mosi amuanhuai mah bang a, amah seppa lak a muanhuaipa. 3Inn sung a papen a-inkuante sang a apahtawi zawk bang un, amah Mosi sang a thupi zawk semna mu dia kilawm a seh ahita hi. 4Inkuan chih in papen kuahiam anei chiat ngal ua; bangkim pa pen bel Pathian ahi. 5Huan huai nung a thugen lai dingte theihsakna ding in, Mosi Pathian inkuante tengteng lak a nasempa in zaw amuanhuai ngei hi. 6Khrist bel Pathian inkuante tung a Tapa in amuanhuai hi. Atawp tan a i kingakna a, i lametna ziak a kipahna, kiptak a i vomhoih photleh, eite a-inkuanpihte i hi uhi.
Lungtang Khauhsak Kei Un
7Huchi in Kha Siangthou gen bang in,
“Tuni a a-aw na zak chiang un,
8Gamdai a ze-etna ni a ahel bang un,
na lungtang uh khauhsak kei un;
9huai lai ah na pi-le-pute un hon ze-et in ahon khem ua,
kum sawmli sung a ka thilhihte amu uhi.
10Huchi in huai suante tung ah ka lung hita kei a,
‘Alungtang un angaihtuah khial gige ua,
ka lampite leng athei kei uh,’ ka chi hi.
11Ka thangpaihna a ka kichiam bang in ka khawlna ah alut kei ding uh,” chi in.
12Unaute aw pilvang un, huchi lou in zaw Pathian hing tawpsan ding in na lak uah kuapeuh sung ah ginlouhna lungtang gilou ahong om kha ding hi. 13“Tuni,” achih lai un niteng in kihanthawntuah zaw un, huchi a na lak ua mi kuamah khelhna khemhat ziak a hihkhauh a na omlouhna ding un. 14I kingakna kipatna pen atawp tan a kiptak a i vomhoih photleh Khrist a tan neite i hita uhi.
15“Tuni in a-aw na zak chiang un ahel lai bang un,
na lungtang uh khauhsak kei un,” akichih lai teng.
16Ahihleh kuate ahi ua thei napi a helte? Aigupta a kipan a Mosi pipawt tengteng hilou uhia? 17Kuate tung ah ahia, kum sawmli sung alunghih louh? Hihkhialte aluang uh gamdai a pukmangte tung ah hilou hia? 18Thumangloute kiang ah kia lou ngal kua kiang ah ahia akhawlna a lut lou ding a akichiam? 19Huchi in ginlahna ziak in alut theita kei uh chih i thei uhi.
Currently Selected:
HEBRUTE 3: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
