HEBRUTE 2
2
Hotdamna Thupi
1Huaiziak in bil a i zakte phatuamngaitak in i khawk sa nawn sem ding uh, huchi lou in zaw i tolhmangsan kha zenzen ding uhi. 2Angelte zang a thugen nangawn akip a, tatlekna leh thumanlouhna chiteng in thukna diktathuaitak amuh zel ngal un, 3huchi tel a hotdamna thupi ngeingaih kei leng bangchi in ahia i suahtak theih mahmah ding? Huai hotdamna thu atung a Toupa zang a gen khit ahi a, azate'n hon na hihkipsak uhi. 4Pathian in leng chiamtehnate leh thillamdangte leh thilhihtheihna chiteng toh, ama deih bang zel in Kha Siangthou thilhawmte toh, amaute atheihpih hi.
Hotdamna Makaipa
5Khovel hong om ding a tanchin i gen uh, angelte nuai ah akoih kei hi. 6Himahleh mi kuahiam in koi lai hiam ah hiai thu gen in atheisak hi,
“Mihing bang atel a, na theihgige?
Mihing tapa leng bang ahia, na veh nak?”
7“Amah angelte sang a nuaizaw zek in na bawl a;
thupina leh pahtawina na khusak a, na khutsuak tung ah heutu in na bawl hi,
8akhenuai ah bangkim na koih a,” chi in.
Huchi in bangkim anuai a akoih ziak in anuai a koih louh bangmah anei kei hi. Himahleh tu'n ah zaw bangkim anuai a om in i mu nai tadih kei uhi. 9Himahleh Jesu, angelte sang a niamzaw deuh a abawl takdih tuh, sihna thuak in thupina leh pahtawina khuksak a om in i mu zaw, huchi a Pathian hehpihna ziak a michih a ding a sihna acheptheihna ding in. 10Amah a ding leh amah ziak a bangkim omsakpa'n tapa tampi thupina a pilut a, athuakna ziak a amaute hotdamna makaipa bukim hih amah a dia kilawm him ahi.
11Hihsiangthoupa leh hihsiangthoute avek un mi khat a pawt ahi uh. Huaiziak in ama'n amaute unaute, chih azum kei hi.
12“Ka unaute kiang ah na min ka gen dia;
omkhawmte lak ah la sa in ka hon phat ding,” chi in.
13Huan “Amah ah ka muanna ka nga
dia, achi nawn hi.
Huan en dih ua, kei leh
Pathian hon piak tate,” achi nawn lai hi.
14Huchi in naupangte sa leh sisan tangte ahih chiat ziak un, amah ngei in huai bangmah atang sam hi; asihna a sihna thuneipa, diabol, ahihmanthat theihna ding leh, 15sih kihtak ziak a damsung sikha a omte tengteng asuahtaksak theihna ding un. 16Ahitak in, ama'n apanpih zelte zaw angelte ahi kei ua, Abraham suante apanpih zaw ahi. 17Huchi in mite a ding a khelhna thupha tawina bawlsak ding in, Pathian lam a siampu lianpen, milainat thei leh muanhuaitak ahihtheihna ding in, bangkim a-unaute bang a hong om amah a ding in akiphamoh him ahi. 18Amah ngei in khemna tuak a, ana thuak tak ziak in khemna tuakte apanpih thei ahi.
Currently Selected:
HEBRUTE 2: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
