HEBRUTE 12
12
Jesu En Gige In
1Huaiziak in huchi tel a theihpihte, meipi thupi umsuak a i om thei in, hon hihnok peuhmah leh khelhna eimah a belhte koihmang ni, huan i ma ua kitaitehna ding om ah kuhkaltak in tai ni. 2Jesu, i ginna siampa leh hihkippa, ama a kipahna om ziak a zahlaknate ngaineu a kros a thuakpa, Pathian laltutphah taklam a tupa, amah lam en in.
3Na khalam ua na bah ua, na lungkiaklouhna ding un, mikhialte a pan a huchibang a selkalhna thuakpa ngaihtuah un. 4Khelhna dou in sisan suak hial in na pang nai kei uhi; hanthawnna thu, tate taihilh bang a nou hon taihilhna na mangngilhta uhi.
5“Ka ta, Toupa sawina ngaineu ke'nla,
ataihilh a na om in leng lungke sam ke'n;
6Toupa'n a-itte asawi nak a,
ta akipahpih avo nak hi,” chi in.
7Na thuak uh zaw noumau a ding ahi; tate tung a hih bang in Pathian in na tung uah ahih a; pa sawi louh ta kua a-om ngei a? 8Ta chihna teng loh a sawina loh lou a na om un bel, tatak hilou in, sawn na hi ua akei dia. 9Huai lou leng eite hon sawi ding, sa ah pate i nei uhi, huaite lah zahtak ngal hang a; huai sang a thupizaw in, i hinna ding in, khate Pa thuthu in i om kei ding ua hia? 10Amau zaw ni sawt louchik, hoih asak bang zel un ahon sawi ua, ama'n bel asianthouna i tantheihna ding in, i hoihna ding in ahon sawi zaw hi. 11Sawina himhim thuak lai in kipahhuai in alang kei a khasiathuai in alang zaw hi, himahleh anung in huchi a sawizawt a omte ding in diktatna gah khamuanhuaitak asuahsak zel hi.
Kithuhilhna Leh Vauhilhna Thute
12Huchi in khut kaikhete leh khut zawte liktou un; 13huan khebai kilawisak lou a, hihdam a a-om zawkna ding in, na khete uh a ding in lamtang bawl un.
14Mi tengteng toh kituahna leh sianthouna delh un, huai sianthouna lou in kuamah in Toupa amu kei ding uhi; 15Pilvangtak in en un, huchi lou in zaw Pathian hehpihna ngah zou lou kuahiam a-om ding a, khaatna zung banghiam hong sel a nou hon hihbuai in, huai in mi tampi hihnit in a-om ding uhi; 16kingaihhat hiam, Esau bang a Pathian zahloumi hiam ahong om kha ding hi. Ama'n ata masa hihna an khatvei nek in akhawngta hi. 17Huai nung in vualzawlna gouluah a-ut in, khitui ke kawm in phatuamngaitak in zong mahleh, kisikna hun amuh louh ziak in paih in a-omta chih na thei uhi.
18Nou zaw tang khoih theih, mei a kangte, meivomte, mialte, huihpite, 19pengkul ginnate, thugen ging omnate tung na hi kei ua; huai ging zate'n thudang akiang ua gen nawn lou ding in angen uhi. 20“Gamsa nangawn in huai tang akhoih aleh suang a denlup in a-om ding,” ahi chih thupiak pen athuak thei kei uhi. 21Athil muh peuhmah uh akihtakhuai mahmah ziak in Mosi in, “Ka lau a, ka nak lin mahmah,” achi hial hi.
22Himahleh Zion tang, Pathian hing khopi, van lam Jerusalem, sim zoh louh angel hon khawmpite, 23ta masa van a min tuang saptuam hon kiang, Pathian, mi tengteng ngaihtuahpa kiang bang, midiktat hih hoihkim kha kiang leh, 24Jesu thukhun thak palai kiang, sisan theh, Abel sisan sang a thuhoihzaw genpa kiang tung na hi zaw uhi.
25Thugenpa na deih kei kha ding uh, pilvang un. Lei a amaute taihilhpa adeih louh ua bawn, gimthuakna apelh louh ngal un, eite, van a kipan a hon taihilhpa kiheisante'n i pel kei sem ding uhi. 26Huai hun in aw in lei ahihling a, “Himahleh tu'n zaw, khatvei lei kia hilou in, van leng ka hihling nawn ding chi in akichiam zawta hi.” 27Khatvei ka hihling nawn ding chih in, thil lingloute a-om dettheihna ding in, thil lingtheite thilsiamte bang phet in, suanmang in a-om ding chih theisak ahi.
28Huchi in hihlin vual louh gam i tan ziak in, hehpihna i nei ding ua, huaiziak in zah leh laudan siam kawm in, Pathian pahtak lam nna i sem thei ding uhi. 29Pathian zaw mikatmang hat mei ahi.
Currently Selected:
HEBRUTE 12: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
