HEBRUTE 11
11
Ginna A Mihangsante
1Ginna tuh thil lamette om ngei a theihtelna leh thil muhlouhte theihchetna ahi. 2Huai ah nidanglai upate'n phat aloh uhi.
3Ginna in khovelte Pathian thu a suktuah ahita chih i thei ua, huchi in thil muhtheihte leng thil langtheite a siam ahi kei hi.
Abel
4Ginna in Abel in Kain sang in Pathian kiang ah kithoihna hoihzaw alan a, huaiziak in midik hihna amu chih Pathian in athilpiakte apomna ah atheisak hi; huai ginna ziak mah in ama'n sih nung nangawn in thu agen lai hi.
Enok
5Ginna in Enok leng sihna chiam lou ding in lakmang in a-om a; Pathian in alakmang ziak in muh theih ahita kei a; lakmang a a-om ma in Pathian pahtak lam mi ahi chih theihsakna amu khinta hi. 6Himahleh ginna lou in amah pahtak lam mi hih vual ahi kei; Pathian kiang a hong pai in, amah a-om chih leh azong mite lohchingsakpa ahi chih gin ding ahi.
Noah
7Ginna in Noah thil muh nailouhte lam thu ah Pathian hilh a om in, Pathian laudan siam in a-inkuan hotdamna ding in long abawl a; huai in khovel siam louh atangsakta hi, ginna ziak adiktatna gouluahpa ahita hi.
Abraham
8Ginna in Abraham sap a a-om lai in agouluah ding mun a lut ding in paikhiakna ding thu amuta hi; apaina ding lam thei lou in apaikheta hi. 9Ginna in gam chiam ah mi gam a taam bang in ana taam nilouh a, thuchiam kikhat gouluahpih ding Isak leh Jakobte toh puanin ah a-om uhi. 10Khopi suangphum nei, Pathian gel leh lam angak nilouh hi.
Sarah
11Ginna in Sarah ngei in leng a chiampa muanhuai asak ziak in, atek nung in chi paitheihna amu hi. 12Huchi in pasal khat amah lah misi bang mai a kipan, “Van a aksite bang a tam, tuipiau a piaunel bang a sim zoh louh suangtu,” ahong suakta uhi.
13Hiai mi tengtengte'n thilchiamte tang khin hilou in, himahleh huaite gamlapi a kipan galmuh a na kipahpih hi zaw in, lei ah zaw khualzin leh mikhual lel ahi uh chih kitheigige in ginna nei in amaute asita uhi. 14Huchibang a thu na gente'n amau gam ding azong uh chih ahihlang mahmah uhi. 15Apawtsan gam uh lunggulh hi le uh bel kik nawnna hunlem mu mahmah ding ahi uhi. 16Himahleh tu'n bel gam hoihzaw huai van a om pen deih ahi ua; huchi in Pathian a Pathian uh chih a om azum kei a; amau ding in khopi khat abawlsak hi.
Abraham
17Ginna in Abraham tuh ze-et a om in, Isak alan a; huan thuchiamte kipaktak a sangpa'n atapa neihsun alan hi, 18huai lah, “Isak ah na suante akiminloh ding,” achih pen ahi. 19Pathian in misi lak a kipan nangawn kaithou thei in asep a; huchi in gentehna dan a gen in amah misi lak a kipan mu nawn ahi ngei hi.
Isak leh Jakob
20Ginna in Isak in thil hong tung dingte thu ah Jakob leh Esau avualzawl hi. 21Ginna in Jakob in asih ding kuan in Joseph tate avualzawl tuaktuak a, “Achiangkhun dawn a kingai in Pathian abia hi.”
Joseph
22Ginna in Joseph in asih ding kuan in, Israel suante pawt ding thu agen a; aguhte vui ding tungtang thu apia hi.
Mosi
23Ginna in Mosi apian lai in, naungek melhoihtak ahi achih ziak un kha thum sung anu leh apate sel in a-om a; kumpipa thupiak leng alau kei uhi. 24Ginna in Mosi in ahong pichin nung in Pharaoh tanu tapa a kiloh a-ut kei a; 25sawt lou kal a dia khelhna nopna kipahpih sang in Pathian mite toh sukgentheih thuak atel zawta hi. 26Khrist amuhsitna uh Aigupta gam goute sang a hauhsakna thupizaw in angai a; kipahman piak ding a-et zel ziak in.
27Ginna in kumpipa thangpaihna lau lou in Aigupta gam apaisan a, muh theih louh pa amuh ziak in athuak teitei hi. 28Ginna in Paikan Ankuangluina leh sisan thehna abawl a, ta masa hihmangthangpa'n amaute akhoihlouhna ding in.
29Ginna in gam hul a pai bang in Tuipi San akan ua, Aiguptate'n tua bang a hih atum sam ua, tui ah akelum uhi.
Jeriko Kulh Lakna Leh Rahab
30Ginna in Jeriko khokulh ni sagih a-um nung un achimta hi. 31Ginna in Rahab kizuaknu, gingloute lak ah amangthangkhawm kei, enkhete iim nei lou a ana pahtak ziak in.
Mihangsan Dangte Nasep
32Huan bang ka gen nalai dia? Gideon thute, Barak thute, Samson, Jepthah leh David thute, Samuel thute, zawlneite thute gen ni chi lehang hun in hon daih lou ding ahi. 33Huai mite'n ginna in gam ala ua, thudik a vaihawm azong ua, thuchiamte atang ua, humpinelkai kamte achihsak uhi. 34Mei thilhihtheihna ahihmit ua, namsau hiam nangawn apel ua, hatlouhna a kipan hattak a bawl in a-om ua, kidouna ah mihat minthang ana hi ua, namdang kidou pawlte ataikeksak uhi. 35Numeite'n amisite uh thounawn amu ua; khenkhatte gimthuaksak in a-om ua, thohnawnna hoihzaw atantheihna ding un khahkhiakna adeih kei uhi. 36Midangte'n leng nuihza bawlna leh vuak athuak ua, ahi, huai lou leng, kolbut leh hentakna atuak uhi. 37Suang a den in a-om ua, sing-atna a attan in a-om ua, khemna atuak ua, namsau a satlup in a-om ua; belam vun leh kel vun silh in avakvai ua; gentheitak a gimthuak a sawi in a-om uhi. 38Khovel amau tenna tak hilou mite, gamdai mun, mual tung, phaizang leh kawlhawm ah avial vakvak uhi.
39Ahi a, hiaite tengteng in ginna ziak in phat na loh khin mah le uh thilchiam pen atang kei uh; 40Pathian in eite a dia thil hoihzaw muhkholh aneih ziak a, ei tel lou a amaute hihbukim a a-omlouhna ding ziak uh ahi.
Currently Selected:
HEBRUTE 11: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
