GALATIATE 6
6
Unau Tundingna
1Unaute aw, mi takhial bangpeuh ahih lai phawk a na omleh nou khamite aw, khemna ka tuak sam kha ding e, chi a kivenghoih kawm in, huai bang mi nunnemna lungsim toh tungding thak nawn un. 2Na puakgikte uh kidawn chiat un, huchi in Khrist dan na zui uh ahi ding. 3Mi bangmah hiloupi in mi liankuam a akibawlleh amah kikhem tawm lel ahi.
4Michih in amah thilhih ki-enchian hen; huchi a midang toh kiteh a, ki-uangsak lou a, amah mah a suanhuai thil ahihtheihna ding in. 5Michih in ama puak mah po ding ahi ngal a. 6Thuhilh a ommi in thil hoih tengteng ahilhpa kiang ah pe sam hen.
7Zekhem in om kei un; Pathian zaw khem a mawkbawl vual ahi kei; mi'n atuh peuh uh huai mah at nawn ngei ding ahih ziak un. 8Amah salam a tuh in sa a om siatna a-at ding a, khalam a tuh in bel kha a kipan tangtawn hinna a-at ding hi. 9Huchi in thil hoih hih chimtak kei ni; i lungkiak keileh ahuntak ah i at ngei ding uhi. 10Huchi in lemtang hun i neihdan bang zel in mi tengteng tung ah thil hoih hih ni, ginna inkuanpihte lak a omte tung ah hi kholdiak hen.
Vauna Nanung
11Keimah khut mahmah a na kiang ua laimal gol pipi a ka gelh en un. 12Sa a mel kilawmsak utte peuhmah in zeksum a om ding in nou ahon sawl teitei nak uhi; bangmah dang ziak ahi kei, Khrist kros ziak a sawina athuaklouhna ding lel uh ahi. 13Zeksumte nangawn in leng dan azui tuan sam kei ua, na sa uah, suan ding aneihtheihna ding un na zek uh kisumleh chih a-ut lel uh ahi. 14Ke'n zaw i Toupa Jesu Khrist kros lou ngal ka suan louh ding dan, huai kros ziak in khovel kei a ding in kilhden in a-om a, kei leng khovel a ding in kilhden in ka om hi. 15Siam thak nawnna lou zaw zeksum bangmah ahi kei a, zeksum louh leng bangmah ahi sam kei hi. 16Huai dan bang a om peuhmahte tung ah lemna leh zahngaihna, Israel' Pathian tung ngei ah om hen.
17Tuban siah kuamah in hon hihbuai nawn kei hen; ka pumpi ah Jesu chiamtehnate ka pu ngal a.
18Unaute aw, Toupa Jesu Khrist hehpihna na kha uah om hen. Amen.
Currently Selected:
GALATIATE 6: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
