EPHESATE 1
1
Chibai Bukna
1Paul, Pathian deihlam a Khrist Jesu sawltak in, misiangthou Ephesa a om Khrist Jesu a miginomte kiang ah: 2Pathian i Pa leh Toupa Jesu Khrist kiang a kipan hehpihna leh khamuanna na kiang uah om hen.
Khrist A Khalam Vualzawlnate
3I Toupa Jesu Khrist Pa leh Pathian phat in om hen. Ama'n van munte ah khalam vualzawlna chiteng in eite Khrist ah ahon vualzawlta hi. 4Amah mai a siangthou leh dembei a om ding a leitung pian ma a eite hon tel tak bang ngei in; 5Ama'n adeih leh atup bangbang in, eite Jesu Khrist vang a atate hi ding in, itna ziak in hon sepkhol khinta hi. 6Huchi a it a ahon piak hehpihna thupi mahmah pahtawina i hihtheihna ding ahi. 7Asisan ziak in amah ah tatkhiakna, ahehpihna hauhdan bang a i tatleknate ngaihdamna ngei i tangta ua, 8huai mah tuh ama'n eite lam ah pilna leh theihsiamna chiteng hon dimsakta a; 9athiltup Khrist a agelkhiak bangbang in adeihlam thuguk eite ahon theisakta hi. 10Huai adeihlam thilgel bel; hunbi ahong kim chiang a, thil tengteng, van a omte leh leitung a omte Khrist ah gawmkhawm a asuktuah vek ding ahi.
11Ama deihlam a lunggel bang a thil bangkim semkhepa tup bang ngei in, amah mah ah sehkholh a om in i gouluah ding i muta uhi. 12Koute, Khrist a ana lamen masate, athupina pahtawina ding a hing ding in sehkholh in ka na om khinta uhi.
13Huan noute'n thutak thu, na hotdamna tanchinhoih uh ngaikhia a na gintak nung un, amah ah chiamsa Kha Siangthou a chiamteh in na omta uhi; 14huai tuh, Pathian thupina ding a tatna kim i tan mateng a i gouluah ding tang ngei ding i hi chih khamkholhna ahi.
Paul Thumna
15Huaiziak in ke'n leng Toupa Jesu a ginna na lak ua om leh misiangthoute tengteng tung a na itna uh ka zak in, 16ka thumnate ah na min uh lou in nou ziak a kipahthu gen ka tawp kei hi; 17i Toupa Jesu Khrist Pathian, thupina Pa'n, amah theihna lam thu a pilna leh kilakna kha nou ahon piaktheihna ding in. 18Huchi a na lungsim mitte uh hihvak a hong om a, ama'n nou ahon sapna lametna bang leh misiangthoute agouluah hauhsaknate na theihna ding un. 19Huan agingta eite athilhihtheihna thupina teh vual louh, huai a hatna thilhihtheihna toh asep bang zel in. 20Hiai thilhihtheihna bel misi lak a kipan a Khrist akaihthoh a, vanmun a, ataklam a atutsak hun a, 21lalnate, thuneihnate, thilhihtheihnate, vaihawmna tengteng tung leh tu khovel kia hilou a khovel hong tung ding nangawn a minsak chiteng tunglam pek ah akoih lai a azat mah ahi. 22Ama'n akhenuai ah bangkim akoih a, saptuam a bangkim tung a lutang in amah abawl a, 23huai saptuam apumpi ahi a, amah bangkim a bangkim hihdimpa taangchinna ahi.
Currently Selected:
EPHESATE 1: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
