GALATIATE 5
5
Khrist A Noplenna
1Noplen ding in Khrist in ahon suaktasakta, huaiziak in dingkip unla, bawi hakkol ah zaw lut nawn kei un. 2Ngai un kei Paul in na kiang ua ka gen, zek na sum uleh Khrist nou a ding in bangmah phattuamna hilou ding ahi. 3Ahi a, dan thu tengteng zui ding a bate ana hi uh chih zeksumte tengteng kiang ah ka theisak nawn ahi. 4Nou dan a siamtan tumte aw, Khrist toh kikhenta na hi ua, hehpihna na puksanta uhi. 5Kou bel Kha ziak in ginna in diktatna lametna ka ngak uhi. 6Khrist Jesu ah zeksum bangmah aphatuam kei a, zeksum louh leng bangmah aphatuam sam kei; itna a sem ginna bel aphatuam hi.
7Hoihtak in na tai uhi. Kua'n thutak zui lou ding a hon dal ahia? 8Hiai khemna zaw nou hon sampa kiang a kipan ahi kei hi. 9Silngou tawmchik in tanghou beupi azelsuak hi. 10Kei ngaihtuahna bang lou in na ngaihtuah lamdang tuan kei ding uh chih Toupa ah ka hon muang hi; himahleh nou hon hihbuaite, akua akua hita le uh vaihawmna atung ua kia pen athuak ding uh ahi.
11Unaute aw, ke'n zeksum thu gen lailai ka hihleh, bangziak a sawi a om lailai ka hia? Huchibang ahih ngalleh kros kisuihna tuh hihmang ahita ding hi. 12Nou hon hihbuaite satkhiak in om vanglak le uh ka deih ahi.
Kha A Hinna
13Nou unaute aw, noplen ding a sap na hi ua; himahleh na noplenna uh sa a ding a lemtanna in zang kei unla, itna in akua akua a ding a kisepsakte hi zaw un. 14Nangmah na ki-it bang in na vengte na it ding ahi, chih thu kam khat ah dan thu tengteng kimsak in a-om hi. 15Himahleh na kikeih ua, na kinektuah uleh na kinekgaihlouhna ding un pilvang un.
Kha Pina
16Huchi in hiai ka chi ahi, Kha ah om un, huchi in taksa utna na hihtangtung kei ding uhi. 17Sa in Kha adou nak a, Kha in leng sa adou hi; thilhih na tupte uh na hihtheihlouhna ding un huaite akikalh uh ahi. 18Himahleh Kha pi a na om uleh dan nuai ah na om kei uhi.
19Huan sa thilhihte akilangchian hi, huaite hiaite ahi uh: angkawmna, kingaihna, thanghuaina, hukna, 20milim biakna, bumna, huatna, kinakna, hazatna, hehna, kilanna, omtuamna, gintuamna, 21deihgohna, tualthahna, zukhamna, zumun uangtatna, huchibang thilhih chingte'n Pathian lalgam atang kei ding uh chi a tuma a ka hon hilhkholh mah bang in, ka hon hilhkhol ahi.
22Kha gah ahihleh, itna, kipahna, lemna, thuaktheihna, migitna, hoihna, muanhuaina, 23nunnemna, kidektheihnate ahi zaw uhi; huchibang kalh lam in dan himhim a-om kei hi. 24Khrist Jesu a hitate'n sa, alunggulhna leh aduhgawlna toh akilhdenta uhi. 25Kha a hing i hihleh kha mah ah i om ding uhi. 26Kitawngtuah a, kihaza chiat in, i kikoihlian kei ding uhi.
Currently Selected:
GALATIATE 5: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
