GALATIATE 4
4
1Himahleh huchi in ka chi ahi, Gouluah dingpa bangkim tung ah toupa himahleh naupang ahih lai teng sikha toh bangmah in akilamdang kei; 2apa hun seh ahong tun masiah achilpa leh akempa nuai ah a-om hi. 3Huchibang in ei leng naupang i hih lai in, khovel thubulte nuai ah sikha in i om uhi. 4Himahleh ahunbi ahong kim in, Pathian in a Tapa, numei suan in, dan nuai a hong suak in ahon sawlkhia hi; 5ta hihna i muhtheihna ding leh dan nuai a omte tankhe ding in.
6Huan tate na hih ziak un Pathian in a Tapa Kha, “Abba, Pa,” chi a kikou in, i lungtang uah ahon sawl hi. 7Huchi in sikha na hita kei ua, ta na hi zawta uhi; huan ta na hihleh Pathian vang a gouluah ding na hi uhi.
Paul In Galatiate Awlmohna
8Hinapi, tuma Pathian na theih louh lai un, apiandan mawng ua pathian hilou hialte sikha na hi uhi. 9Himahleh tu a Pathian na hon theih nung un bel, ahihkeileh Pathian theihmi na hong hih nung un chih ding ahi zaw; thubul zawngkhal leh namanloute nuai a bangchidan a bawi a tan ut nawn na hi ua? 10Nite, khate, hunte, kumte na tang zel ua. 11Na tung uah tha ka sengthawn kha ding chih ka lau hi.
12Unaute aw, ka hon ngen ahi, keimah bang in om un, kei leng noumau bang in ka om a, ka bangmah na hihse kei uhi. 13Tanchinhoih na kiang ua ka gen masakna pen ka sa hat louh ziak ahi chih na thei uhi. 14Huan ka sa a nou a dia khemna om tuh na simmoh kei ua, na kih sam kei uh; Pathian angel bang leh Khrist Jesu bang hial in na hon pakta zaw uhi. 15Vangpha na kisakna uh koi a omta ahia le? Hihtheih liai hileh na mit uh khelkhia in na hon pe khin ding uh chih ka hon theihpih ahi. 16Thutak ka hon hilh ziak in na melma uh ka hong hita a hia?
17Amau noute phatuamngaitak in, ahoih lam deih hilou napi in ahon zol ua; ahi, amau a dia phattuam na ngaih theihna ding ua koute a kipan posiah a hon omsak a-ut uhi. 18Atup ahoih nakleh ahoih lam ah chik lai peuh in phatuamngaih gige ahoih hi, na kiang ua ka om lai kia hilou in. 19Ka unaute aw, Khrist noumau a siam piching a a-om masiah nauvei in ka hon vei hi. 20Ahi, tulai in na kiang ua om a, ka awsuah hihlamdan ka ut theihdan; na tungthu uah ka mang abang ahi.
Sarah Leh Hagar Etsakna
21Dan nuai a om utte aw, hon hilh un, dan in agen na thei kei ua hia? 22Hichibang a gelh ahi: Abraham in tapa nih anei a, khat sikhanu toh khat noplennu toh ahi. 23Himahleh sikhanu lak a pen sadan in apiang a, noplennu lak a pen bel thuchiam ziak a piang ahi. 24Huai thilte etsakna ahi, huai numeite thukhun nih ahi uh; khat Sinai Tang a sikha hi ding a ta neinu, Hagar ahi. 25Huan Hagar bel Arabia gam a Sinai Tang ahi a, tulai a om Jerusalem toh kibang ahi, atate toh sikha in a-om uhi. 26Tunglam Jerusalem bel noplen ahi; huai ngeingei eite nu ahi.
27“Nang chiing, ta nei ngei lou,
nuam in, nang,
nauvei ngei lou,
kikoukhia in; pasal neinu sang in lungzuangnu
tate tamzaw ding ahi ngal a,” chih gelh ahi.
28Huchi in unaute aw, eite Isak bang in thuchiam tate i hi uhi. 29Himahleh huai lai bang in tu in leng ahi; sadan a piang in Khadan a piang asawi ahi. 30Himahleh Laisiangthou in bangchi in agen a? “Bawinu atapa toh hawlkhia un; bawinu tapa in noplennu tapa gou aluahpih louh ding ziak in,” achi hi. 31Huchi in unaute aw, bawinu tate i hi kei ua, noplennu tate i hi zaw uhi.
Currently Selected:
GALATIATE 4: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
