GALATIATE 3
3
Dan leh Ginna
1Nou Galatia mihaite aw, kua'n hon bumhai amaizen a? Na mitmuh ngei ua Jesu Khrist kilhden a kichiantak a lahsak zaw hiven maw. 2Hiai leltak ka hon dong ding; dan thilhihte ziak in hia Kha na muh uh, na ngaihkhiak ua na gintak ziak un? 3Hichi tel in na hai uh maw? Kha a pan khin ngal in, sa in na zou ding ua hia? 4Thil huchi zahzah athawn a thuak na hi uh maw? Athawn taktak na hitaleh. 5Na kiang ua Kha hon pepa leh na lak ua thillamdang hihpa'n dan thilhihte ziak in hia ahih, na ngaihkhiak ua na gintak ziak un?
6“Abraham in Pathian agingta a, huai ginna diktatna a simsak ahih tak mah bang in,” 7Huchi in thei un, ginna a omte Abram tate ahi uhi. 8Huan Laisiangthou in, “Pathian in ginna ziak in Zentelte siamtangsak ding in akisa chih theikhol in, nangmah ah namte vualzawlsak in a-om ding uh,” chi in Abraham kiang ah tanchinhoih ana genkholta hi. 9Huchi in ginna a omte ginna mipa Abraham toh vualzawlsak in a-om sam nak uhi.
10Dan thilhih a kinga peuhmahte hamse nuai ah a-om uhi, “Dan laibu a thugelh tengteng bang a hih gige lou peuhmah hamsiat in om hen,” chi a gelh ahi. 11Tu in Pathian mitmuh in kuamah dan a siamtang a-om kei, “Midiktat tuh ginna in ahing ding,” chih ahih ziak in chih alang kilkel hi. 12Himahleh dan zaw ginna a kinga ahi kei; huchibang a hihpa huaite in ahing ding chih ahi zaw hi.
13Eite sik in Khrist hamsiat in ahong om a, dan hamsia a kipan in ahon tankheta hi, “Sing a khailup peuhmah hamsiat hi hen,” chih gelh ahih bang in. 14Huchi a Abraham tung a vualzawlnate Khrist Jesu ziak a Zentelte tung ahong tun theih a, ginna ziak a chiam a om Kha pen i muhtheihna ding in.
Dan leh Thuchiam
15Unaute aw, mihing hihdan in gen leng; mihing thukhun leltak leng, hihkipsa nung aphel kei ua, behlap leng abehlap ngei kei uhi. 16Abraham kiang ah leh achisuante kiang ah thuchiamte piak ana hi. Mi tampi tungthu gen bang in, “Chisuante kiang ah,” achi kei a; mi khat tungthu gen bang in, “Nang chisuan kiang ah,” achi zaw a, huai tuh Khrist ahi. 17Huchi in hiai ka chi ahi; huai thuchiam bangmah lou suaksak a hihmang ding in, thukhun Pathian in ana hihkipsa, anung kum zali-le-sawmthum khit a hong om, dan in ahihmang thei kei hi. 18Gouluah ding thu dan ziak ahihleh thuchiam ziak ahita kei ding a; himahleh Pathian in Abraham kiang ah thuchiam ziak in ahi ana piak.
19Ahihkeileh bangchi thu a dan om ahia le? Chisuan thuchiamna ahong om masiah tatleknate ziak in behlap in a-om a, angelte zang a palai khut a hihkip ahi. 20Huan palai himhim mi khat lak ah palai ahi ngei kei hi; Pathian bel khat ahi.
Dan In Atup
21Ahihkeileh dan in Pathian thuchiamte akalh hia? Kalh lou hial! Hihhing thei himhim dan piak a om na hitaleh, dan ziak in diktatna a-om ngei ding hi. 22Himahleh Jesu Khrist gin ziak a thilchiam a gingtate kiang a piak ahihtheihna ding in Laisiangthou in khelhna nuai ah bangkim akhakkhum vekta hi.
23Himahleh ginna ahong tun ma in ginna hong kilang ding ah khakkhum in dan nuai a ven i na hi uhi. 24Huchi in ginna ziak a siam i tantheihna ding in huai dan tuh Khrist hon chilpa ahi. 25Himahleh ginna ahong tun in, hon chilpa nuai ah i omta kei uhi.
Pathian Tate
26Khrist Jesu gin ziak in Pathian tate na hi vek uhi. 27Noute Khrist a baptis lut a omsate Khrist in na kithuamta uhi. 28Huai ah Juda mi a-om kei a, Grik mi leng a-om kei; huai ah sikha a-om kei a, noplen leng a-om kei; huai ah pasal leh numei leng a-om kei hi. Khrist Jesu ah na vek un pum khat na hi uhi. 29Huan Khrist a na hih uleh Abraham suan thuchiam bang a gouluah dingte na hi uhi.
Currently Selected:
GALATIATE 3: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
