GALATIATE 2
2
Paul Leh Sawltak Dangte
1Kum sawm-le-li abei nung in Titas mah leng pi in, Barnabas toh Jerusalem ah ka va hohtou nawn hi. 2Kilakna ziak a va hohtou ka hi a, Zentelte kiang a tanchinhoih ka tangkoupih amau ka va hilh a; himahleh milian deuhte atuam in ka hilh a; huchi lou in zaw athawn a tai kha hiam ahihkeileh taithawnta ka hi kha ding hi. 3Himahleh ka kiang a om Titas hial leng Grik mi himahleh zeksumsak teitei in a-om kei hi. 4Huai unau tak lou, aguk a pilut a omte, sal a ahon laktheihna ding ua Khrist Jesu a noplenna i neih uh enkhe ding a hong lutte ziak in ahi. 5Himahleh noute a dia huai tanchinhoih thutak a bittak a kep ahihtheihna ding in amau kiang ah mitphiat kal lel leng ka kipe himhim kei uhi.
6Hihna deuh min nei mahmahte bangchibang hihna nei mah le uh kei a ding in alamdanna a-om kei hi. Pathian in kuamah akhentuam kei a; huai min nei mahmahte thugen in bangmah hon behlap kei hi. 7Huchih nak sang in zeksumte kiang a tanchinhoih Peter kiang a kepsak a a-om bang in zeksumlouhte kiang a tanchinhoih kei kiang ah kepsak in a-om chih athei zaw uhi. 8Zeksumte sawltak hi ding a Peter a sempa mah in Zentelte sawltak hi ding in kei ah asem hi. 9Huan kei kiang a piak a om hehpihna amuh un, Jakob, Kifas, Johan, khuam muanhuai leh min neite'n amau bel zeksumte kiang a hoh ding leh kou Zentelte kiang a hoh ding in kei leh Barnabas kithuahna khut taklam hon pe zawta uhi. 10Gentheite ka theihgige lel uh adeih ua, huai mah hih ka tum tinten hi.
Paul In Peter Taihilh
11Huan Antiok a Peter ahong pai lai a demhuai mahmah a a-om ziak in amaitang ngei ah ka kalh hi. 12Jakob kiang a kipan mi kuate hiam ahong pai ma un ama'n Zentelte kiang ah an ane zel a; himahleh ahong tuntak un zeksumte akihtak ziak in pang nawn lou in akikoihtuamta hi. 13Juda dangte leng alepchiah chiat sam ua, huchi in Barnabas hilhial leng alepchiahna uah pimang in a-om zou hial hi. 14Tanchinhoih thutak bang in a-om kei uh chih ka theih in avek ua ma ah Peter kiang ah, “Nang Juda mi na hi ngal a, Judate om bang a om lou in Zentelte om bang a na om zawkleh bangchidan ahia Judate om bang a Zentelte na omsak teitei nak?” ka chi hi.
Ginna Ziak A Diktansak
15Ei zaw Zentel mikhialte hilou in, Juda mi him a piang i hi uhi. 16Himahleh dan thilhihte ziak in mi siamtang in a-om kei, Jesu Khrist ginna ziak in siamtang in a-om zaw uh chih i thei uhi; e'n leng dan thilhih ziak hilou in, Khrist ginna ziak a siamtang a i omtheihna ding in, Khrist Jesu i gingta hi; dan thilhihte ziak in mihing himhim siamtang a om lou ding uh ahi. 17Ahihleh Khrist a siamtang a om tum kawmpi a eite mikhialte i na hih nakleh Khrist khelhna omsakpa hita ve maw le! Hilou hial! 18Ka thilhihsiatte ka lam nawn zel in zaw, talekpa ka hi chih ka kitheisak phet ahi ding hi. 19Pathian lam a dia ka hong hintheihna ding in, kei zaw dan ziak in dan lam ah ka si khinta hi. 20Khrist toh kilhden in ka omta; himahleh ka hing ahi; keimah pen ka hita kei a, keimah ah Khrist ahing ahi zaw; tua sa a ka hin bel ginna a hing ka hi; Pathian Tapa, hon it a ka sik a kipepa pen ginna ah. 21Pathian hehpihna bangmah lou in ka bawl kei, dan ziak a diktatna a om in zaw Khrist athawn a si ahi kha ding hi.
Currently Selected:
GALATIATE 2: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
