GALATIATE 1
1
Chibai Bukna
1Paul, Jesu Khrist leh misi lak a kipan a kaithoupa, Pa Pathian ziak a sawltak, mihing sawlkhiak hilou, mihing vang a leng hi sam lou, 2leh ka kiang a unau om tengtengte'n, Galatia gam a saptuamte kiang ah: 3Pa Pathian leh i Toupa Jesu Khrist a kipan hehpihna leh khamuanna na kiang uah om hen. 4Ama'n i Pathian leh Pa deihdan in, tulai khovel giloutak lak a ahon suahtaksak theihna ding in i khelhnate a ding in amah mah ahong kipeta hi. 5Pathian kiang ah thupina tangtawn in om hen, Amen.
Tangthupha Dang Om Lou
6Khrist hehpihna ziak a nou hon sampa huchi guih a tanchinhoih tuam lam a na kisuansan uh lamdang ka sa hi. 7Tanchinhoih dang om ahi kei a; noumau hon hihbuai in Khrist tanchinhoih hihlamdan ut kuate hiam a-om uh ahi zaw hi. 8Himahleh koumau hiam, van a kipan hong suk angel nangawn in leng, tanchinhoih na kiang ua ka gensa pen lou ngal uh tanchinhoih dang himhim hon na hilhta a-om uleh hamsiat in om uhen. 9Tuma a ka gen bang un, tua gen nawn ding ka hi. Tanchinhoih na muh pen lou ngal uh, tanchinhoih dang kuapeuh in nou ahon hilhleh hamsiat in om uhen.
10Ahihleh tu in mihing maipha hia ka zon, Pathian a? Ahihkeileh mihing ahi maw lungtaisak ka tup? Mihing ana lungtaisak lel hi taleng, Khrist sikha ka hi kei ding hi.
Paul Tanchinhoih Gen
11Huchi in unaute aw, ka tanchinhoih gen pen mihing a pan ahi kei chih ka hon theisak hi. 12Mihing kiang a kipan a ka muh leng ahi kei, mi hon hilh leng ka hi sam kei, Jesu Khrist kilakna ziak amu ka hi zaw hi.
13Judate sabiakdan a nidanglai ka omdan na thei khinta ngal ua, huchi a Pathian saptuamte nakpitak a sawi in sukchimih ka na sawm gige hi. 14Huan ka pipute thugousiah tung a phatuam ka ngaih tuankhol ziak in Judate sabiakdan lam ah ka chipihte lak a ka khanvual tampite ka na khengta hi.
15Ka nu gilsung a kipan a hon hihtuampa leh ahehpihna ziak a hon sampa Pathian in, 16Zentelte lak a ka hilhtheihna ding a, ama Tapa lungkimtak a keimah a akilaksak lai in, sa leh sisan toh kidong lou in, 17sawltak ka hih ma a sawltak ana hisate kiang a Jerusalem a hohtou tuan lou in, Arabia gam ah ka paimang pah a; huan Damaskas ah ka kik nawnta hi. 18Kum thum abei nung in Kifas veh ding in Jerusalem ah ka va hohtou a, akiang ah ni sawm-le-nga ka taam hi. 19Sawltak dangte, Toupa unau Jakob kia lou ngal kuamah ka mu kei hi.
20Na kiang ua ka thugelhte ngai dih ua, Pathian mitmuh ah ka zuau kei hi.
21Huai nung in Siria leh Silisia gamte ah ka pai hi. 22Judia gam a saptuam, Khrist a omte meltheih ka hi nai kei lai hi, 23“Tuma lam a khatvei ginna thu sukchimih tum a hon sawipa'n tu in huai thu agen zawta,” chih mi gen kia aza uhi. 24Huan keimah ziak in Pathian apahtawita uhi.
Currently Selected:
GALATIATE 1: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
