2 KORINTHTE 13
13
Paul Thuneihna
1Hiai pen na kiang ua ka hong athumveina ding ahi. “Theihpih nih hiam, thum hiam kam ah thu chiteng hihkip in a-om ding hi.” 2Ka genkholta a, anihveina a na kiang ua ka om lai a ka gen bang in, tu'n ah na kiang ua om lou in, tuma lam a thil hihkhialte kiang ah leh midang tengteng kiang ah ka genkhol nawn dek hi, ka hong nawnleh ka hawi kei ding, chih; 3Khrist keimah a thu gen zelpa pen chetna na zon ziak un, amah zaw noumau lam ah ahat lou kei a, na lak uah thilhihtheitak ahi zaw hi. 4Hatlouhna a kilhlup himahleh Pathian thilhihtheihna ziak in ahing hi. Kou leng amah ah ka hat kei uhi, himahleh, noumau lam a Pathian thilhihtheihna ziak in akiang ah ka hing sam ding uhi.
5Ginna ah na om na uhiam chih noumau ngeingei ki-enchian zel un. Ahihkeileh noumau ah Jesu Khrist a-om chih noumau ngeingei in na theichian kei ua hia? Deih louh na hih kei ngal uleh. 6Koute deih louh in ka om kei uh chih na thei lai ding un ka gingta hi. 7Huan thil himhim na hihkhelhlouhna ding un Pathian kiang ah ka ngen zel uhi; koute deihhuai a ka lattheihna ding uh ahi kei a, koute deih louh in om mah le ung noute'n akilawm peuhmah na hihtheihna ding uh ahi zaw hi. 8Thutak gum ding lou in zaw, thutak dou ding in bangmah ka hihthei kei uhi. 9Koute ka hat louh lai un noute na hat ua, ka kipak uhi; noumau hoih lam a na kibawlphat uh thumna a ka nget uh ahi. 10Huaiziak in hihse ding hilou a bawlhoih ding zaw a, Toupa'n thuneihna ahon piak bang zel in, na kiang ua ka om chiang a nakpitak a ka hon taihilhlouhna ding in, na kiang ua ka om louh lai in hiai thu ka gelh ahi.
Chibai Bukna
11Atawp pen in, unaute aw, kipaktak in om un, na omdan uh kitungding unla; ka hon ngetna limsak un, kikhamuantuah in om unla; lungsim mun khat pu unla, kituaktak in om un; huan na kiang uah itna leh khamuanna Pathian a-om ding hi.
12Tawp siangthou in chibai kibuk un.
13Misiangthou tengteng in chibai ahon buk uhi.
14Toupa Jesu Khrist hehpihna, Pathian itna, Kha Siangthou kithuahpihna na vek ua tung ah om hen, Amen.
Currently Selected:
2 KORINTHTE 13: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
