EKSODAS 7
7
1Huan Toupa'n Mosi kiang ah, “En in, Pharaoh a ding in Pathian in ka hon bawlta. Huchi in na sanggampa Aaron na zawlnei ahi ding,” achi hi. 2Thu ka hon piak tengteng na gen ding hi. Huchi in Aaron na sanggampa'n agam a pan a Israel suante sawlkhe ding in Pharaoh kiang ah agen ding.
3“Huan Pharaoh lungtang ka khauhsak dia, Aigupta gam ah ka chiamtehnate leh ka thillamdangte ka pungsak ding hi. 4Himahleh, Aigupta tung a ka khut ka ngaktheihna ding leh ka sepaihte leh ka mi Israel suante, vaihawmna thupite a Aigupta gam a pan ka pikhiak theihna ding in, Pharaoh in nang ahon ngaikhe kei ding hi. 5Aigupta tung a ka khut ka lik a, alak ua pan Israel suante ka pikhiak hun chiang in, Aiguptate'n kei, Toupa ka hi chih athei ding uh,” achi hi. 6Mosi leh Aaron in Toupa'n thu apiak bang in ahihta uhi. 7Pharaoh kiang a thu agen lai un, Mosi kum sawmgiat a upa ahita a, Aaron kum sawmgiat-le-thum a upa ahita hi.
Aaron Chiang
8 Toupa'n Mosi leh Aaron kiang ah thu agen a, akiang uah, 9“Pharoah in na kiang ua, ‘Nou a ding in thillamdang suah un,’ achih chiang in Aaron kiang ah, ‘Na chiangkhun la inla, Pharaoh ma ah khia in, gul hong suak hen,’ na chi ding,” achi hi. 10Huchi in Pharaoh kiang ah Mosi leh Aaron alut ua, Toupa'n thu apiak bang in ahihta uhi. Pharaoh leh asikhate ma ah Aaron in achiangkhun akhia a, gul ahong suak hi. 11Pharaoh in leng mipilte leh bumsiamte asam a; Aigupta mitkhialdawi tawite'n amitkhialdawi un huchibang mah in ahih sam uhi. 12Michih in leng amau chiangkhun chiat akhia ua, gul ahong suak uhi. Himahleh Aaron chiangkhun in amau chiangkhunte avalhta hi. 13Hinapi in Toupa'n achih bang in Pharaoh in alungtang akhauhsak a, amau thu angaikhe nuam kei.
Sisan A Gawtna
14Huan Toupa'n Mosi kiang ah, “Pharoah lungtang akhauhta a, mite paisak anial hi. 15Zingsang in Pharaoh kiang ah va hoh in, ngai in, amah lui a hoh ding ahi a, ahong pai ngak in lui gei ah na dingh in. Na khut in huai chiangkhun, gul hong suak pen na tawi ding ahi. 16Akiang ah, ‘Hebrute' Toupa Pathian in na kiang ah ahon sawl a, gamdai a ka nna aseptheihna ding un, ka mite paisak in.’ Ngai in, tuma lam in na ngeingaih kei, achi,” chi in. 17Hichibang in Toupa'n achi, “Hiai ah Toupa ka hi chih na thei ding. Ngai in, ka khut a chiangkhun in lui a om tuite ka sat dia, sisan ahong suak ding uhi. 18Lui a om ngasate asi ding ua, lui a-uih dia; Aiguptate'n luitui adawn thei kei ding uh,” achi hi.
19Huan Toupa'n Mosi kiang ah thu agen a, “Na chiangkhun la inla, Aigupta tuite tung ah, atui nak neite tung ah, aluite uh tung ah, atuichinte uh tung ah leh atuilite uh tung ah, sisan ahon suahtheihna ding un, Aigupta gam pumpi a singhawmte leh suanghawmte a sisan a-omtheihna ding in na khut likkhia in, Aaron kiang ah chi in,” achi hi.
20 Toupa thupiak bang in, Mosi leh Aaron in ahih uhi. Achiangkhun aliktou a, Pharaoh leh asikhate mitmuh in, lui a om tuite asatta a, lui a om tuite sisan ahong suak vek uhi. 21Lui a om ngasate asi ua; lui a-uih a, Aiguptate'n luitui adawn theita kei uhi. Aigupta gam pumpi ah sisan a-omta hi. 22Aigupta mitkhialdawi tawite'n leng amitkhialdawi tawi un huchi mah bang in ahih uhi. Pharaoh lungtang akhauh a, Toupa'n achih bang in amau angaikhe kei hi. 23Pharaoh akihei a, a-inn ah apaita a, huai thil in alungtang akhoih kei hi. 24Aigupta tengteng in luitui adawn theih louh ziak un, dawn ding zong in lui kim teng akhuat uhi.
Ukengte
25 Toupa'n lui asat nung ni sagih ahong chingta hi.
Currently Selected:
EKSODAS 7: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
