EKSODAS 6

1 Toupa'n Mosi kiang ah, “Tu in Pharaoh kiang a bang ahia ka hih ding na mu ding. Khut thahat in amau apaisak dia, khut thahat in amau agam a kipan hawlkhe ding ahi ngal a,” achi hi.

Pathian In Mosi Asam

2Pathian in Mosi kiang ah thu agen a, akiang ah, “Kei Toupa ka hi. 3Bangkim hihthei Pathian min in Abraham kiang, Isak kiang leh Jakob kiang ah ka kilakta a, himahleh ka min JEHOVAH in alak uah ka kitheisak kei. 4Amau Kanaan gam, mikhual a a-omna gam uh, akhualzinna gam uh, pe ding in amaute toh ka thukhun leng ka hihkipta hi. 5Aiguptate'n koltanna a, atansak un, Israel suante maunate leng ka zata a, ka thukhun ka theigige hi. 6Huaiziak in Israel suante kiang ah, kei Toupa ka hi, chih gen inla, Aiguptate puakgik nuai a pan ka hon pikhe dia, na koltanna ua pan ka hon suaktasak ding, ban zak in leh vaihawmna thupite toh ka hon tan ding hi. 7Mipite a ding in ka hong kilak ding a, noute a ding in Pathian ka hi ding. Huchi in Aiguptate puakgikte nuai a pan hon lakhepa Toupa na Pathian uh ka hi, chih na thei ding uh. 8Gam tungtang thu Abraham, Isak leh Jakob kiang a pe dia ka chiamsa, huai gamsung ah ka hon tun ding. Huchi in gouluah ding in ka hon pe ding, Kei Toupa ka hi,” achi hi. 9Mosi in Israel suante kiang ah huchibang in thu agensawn hi. Himahleh lungsim dahna ziak leh koltanna haksatna ziak in Mosi angaikheta kei uh.

10 Toupa'n Mosi kiang ah thu agen a, 11“Lut in, agam a pan Israel suante apaikhiaksakna ding in Pharaoh kiang ah thu gen in,” achi hi.

12Mosi in Toupa ma ah thu agen a, “Ngai in, Israel suante'n hon ngaihkhiak kei ualeh kei muk sum louh, bangchi in Pharaoh in hon ngaikhe dia?” achi hi.

13Huchi in Toupa'n Mosi kiang leh Aaron kiang ah thu agen a, Aigupta gam a pan Israel suante pikhe ding in Israel suante lam leh Aigupta kumpipa lam ah amaute thu apeta hi.

Mosi Leh Aaron Inkuante Chiamtehna

14Hiaite asuangtute inkuan a kipan alupente ahi uhi: Israel ta masa Reuben tate; Hanok leh Pallu, Hezron leh Karmi, hiaite Reuben inkote ahi uh. 15Simeon tapate: Jemuel, Jamin, Ohad, Jakin, Zohar leh Kanaan numei tapa Shaul. Hiaite Simeon inkote ahi uh.

16Akhang uh dungzui in hiaite Levi tapate min ahi: Gershon, Kohath leh Merari. Levi damsung kumte kum zakhat sawmthum-le-sagih ahi. 17Gershon tapate, a-inkuan dungzui un, Libni leh Shimei. 18Kohath tapate: Amram, Izhar, Hebron leh Uzziel. Kohath damsung kumte kum zakhat sawmthum-le-thum ahi. 19Merari tapate: Mahli leh Mushi. Akhang uh dungzui in hiaite Levi inkote ahi uh.

20Amram in apa sanggamnu Jokebed zi in anei hi. Ama'n Aaron leh Mosi aneihsak hi. Amram damsung kumte kum zakhat sawmthum-le-sagih ahi. 21Izhar tapate: Korah, Nepheg leh Zikri. 22Uzziel tapate: Mishael, Elzaphan leh Zithri.

23Aaron in Amminadab tanu, Nahson sanggamnu, Elisheba zi in anei a, Nadab, Abihu, Eleazar leh Ithamar aneihsak hi. 24Korah tapate: Assir, Elkanah leh Abiasaph. Hiaite Korah inkote ahi uh. 25Aaron tapa Eleazar in Putiel tanute lak a khat zi in anei a, Phinehas aneihsak hi. Hiaite Levi inkuan suangtute inn a kipan a lupente ahi uhi.

26Hiaite Toupa'n Aaron leh Mosi kiang a anam uh dungzui a Aigupta gam a pan Israel suante hon pikhia un, achihte ahi. 27Hiaite Aigupta kumpipa Pharaoh kiang a Aigupta a pan Israel suante pikhe dia thugentute ahi ua, hiaite Mosi leh Aaron mah ahi uhi.

Mosi Leh Aaron Kiang A Pathian Thupiak

28Huan hichi ahong hi a, Aigupta gam a Mosi kiang a Toupa'n thu agen ni in akiang ah, 29“Kei Toupa ka hi. Na kiang a ka gen tengteng Aigupta kumpipa Pharaoh kiang ah gen in,” achi hi. 30Himahleh Mosi in Toupa ma ah, “Ngai in, muk sum louh ka hi a, bangchi in Pharaoh in hon ngaikhe dia?” achi hi.

Currently Selected:

EKSODAS 6: PAITBSI

Highlight

Copy