EPHESATE 6
6
Nu Leh Pa Leh Tate
1Naupangte aw, Toupa ah na nu leh pate uh thu mang un, huai tuh thil dik ahi ngal a. 2“Na nu leh pa zahtak in,” hiai thupiak chiam nei masapen ahi. 3“Huchi in nang a ding in ahoih dia, lei ah leng na damsawt ding hi.”
4Huan nou pate aw, na tate uh hihthangpai kei unla, Toupa thuzohna leh hilhna ah kem zaw un.
Sikhate Leh Pute
5Sikhate aw, Khrist thumang bang in laudan siam leh ling kawm in lungtang khat in sadan a na pute uh thumang un; 6Mihing kipaksakte maimah bang a mitmei kia veng lou in, Khrist sikha bang a lungtang a Pathian deihlam hih zaw in. 7Mihing nasem phet hilou in, Toupa nasem bang zaw a chitaktak kawm a nna sem in, 8michih sikha hi in noplen himahleh thil hoih ahih bang mah Toupa kiang a kipan in angei mah amu nawn ding uh chih thei in.
9Nou heutute aw, huchibang in amau leh noumau heutupa van ah a-om chih leh ama'n mi deihsak tuam anei kei chih thei in vau lou in atung uah hih sam un.
Khristian Galvan
10Atawp pen in, Toupa leh ahatna thagui ah thilhihtheihna nei in hong om un. 11Diabol khemnate na dou zohtheihna ding un Pathian galvan kim in kivan un. 12I doute zaw sa leh sisan ahi kei ua, lalnate leh thuneihnate leh tu a om lel mial tung a khovel vaihawmte leh van munte a kha gilouhon omte ahi zaw uhi. 13Huaiziak in ni hoih lou a na douzohna ding un leh na hihzoh vek nung ua leng na dintheihna ding un, Pathian galvan kim la un.
14Na kawng uh thutak a gak in, diktatna awmphaw zang in, 15lemna tanchinhoih vanzat na khe ua bun in dingh un. 16Huaite ban ah ginna lum la unla, huai in migilou thal kuangthei tengteng na hihmit thei ding uhi. 17Huan hotdamna lukhu leh Kha namsau, Pathian thu la unla; 18thumna leh ngetna chiteng in bangchik lai peuh in Kha ah thum un. Huai lam ah misiangthou tengteng a ding in phatuamngai leh ngen bilbel in limsak un. 19Tanchinhoih thuguk hangsantak a theisak ding a, ka kam ka kat a, thu gensak a ka omtheihna ding in kei a ding in leng hon ngetsak un. 20Ka gen ding bang hangsantak a ka gentheihna ding in, huai tanchinhoih palai khainiang bun ka hi.
Chibai Bukna Nanung
21Himahleh nou leng bangchibang in ka om hiam ka tanchin na theihtheihna ding un, Taikikas, Toupa a unau deihtak leh nasempa muanhuai in bangkim ahon theisak ding hi. 22Huaiziak in amah na kiang uah ka hon sawl ahi, ka tanchin uh na theihna ding uleh ama'n na lungtang uh akhamuan theihna ding in. 23Unaute kiang ah Pa Pathian leh Toupa Jesu Khrist kiang a kipan lemna leh ginna tel itna om hen. 24I Toupa Jesu Khrist tul lou a itte tengteng kiang ah hehpihna om hen, Amen.
Currently Selected:
EPHESATE 6: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
