EPHESATE 5
5
Vak A Khosakna
1Huchi in ata deihtakte bang in Pathian omdan zuite hi un. 2Huan Khrist in hon it a, namtui ding a Pathian kiang a thilpiak ding leh kithoihna ding a i sik a akipiak bang in itna ah khosa un.
3Misiangthou hita na hihman un kingaihna leh siang lou tengteng huaihamna toh, na lak uah lohkhak in om kei hen. 4Zahmohte, thugina lou gente, chiamnuih thu nangawn huaite akilawm lou ahi; huaite gen sang in kipahthu gen zaw un. 5Kingaihhat leh mithanghuai leh mihuaiham in, mihuaiham zaw milim bemi ahi, Khrist leh Pathian lalgam ah gou tan ding anei kei uh chih na thei mahmah uhi.
6Kuamah in thugina lou peuh in hon khem kei uhen; huai thilte ziak in Pathian thangpaihna thumang lou tate tung ah atung nak hi. 7Huaiziak in amau kikoppih kei un. 8Tuma in mial na hi ua, tu'n zaw Toupa ah vak na hong hita uhi; vak tate bang in om un; 9vak gah tuh hoihna, diktatna leh thutak tengteng ahi; 10huan Toupa ah akipah lam pomtak bang ahi hiam zong un. 11Huan mial thilhih gah nei ngeiloute ah leng panna nei kei unla, pan nak sang in adiklouhdan uh theisak zaw un.
12Aguk a athilhih nakte uh agen lel leng azumhuai hi. 13Himahleh thil bangkim adiklouhdan muh theih a om tuh vak hihlat ahi nak hi; muh theih a om peuhmah vak ahi ngal a. 14Huaiziak in
“Nang ihmu! Hak inla,
misi lak a kipan thou in.
Huchi in Khrist in vak hon pe ding,” chih ahi.
15Huan mihaite bang a om lou in, mipilte bang a om zaw in, na omdan uah pilvang un; 16nite ahoih louh ziak in hun na neih sung un atam theipen sem un. 17Huaiziak in hai nuam kei unla, Toupa deihlam bang ahia chih thei zaw un.
18Uain kham in om kei un, huai ah kideklouhna a-om hi; Kha a dim in om zaw un, 19phatna late, Pathian late, khalam late a kihoupih chiat a Toupa kiang a na lungtang tengteng ua ging kilawm bawl leh la sa in, 20i Toupa Jesu Khrist min a, Pathian, Pa ngei kiang a bangkim tung a kipahthu gen gige in.
Khristian Inkuan Omdan Zite Leh Pasalte
21Khrist laudan siam in kiniamkhiak chiat un.
22Zite aw, Toupa kiang a na kiniamkhiak bang un, noumau pasalte kiang ah kiniamkhiak un. 23Khrist amah ngei pumpi hondampa hi a, saptuamte lutang ahih mah bang in zi lutang tuh pasal ahi. 24Huchi in saptuamte Khrist kiang a akiniamkhiak bang un bangkim ah apasalte uh kiang ah zite kiniamkhiak uhen.
25Pasalte aw, na zite uh it un, Khrist in saptuamte a-it a, asik ua akipiak bang in, 26huchi a ama'n tui a sil a, thu a ahihsiangthou theihna ding in; 27huchi a saptuamte nin baang lou, vuai lou leh huchibang thil mawngmawng pu lou a, siangthou leh gensiatbei a om zaw a, saptuamte amah-le-amah thupitak a akipiak theihna ding in. 28Huchibang in pasalte'n leng amau pumpi mah bang in amau zite a-it ding uh ahi. Ama zi itpa amah ki-it ahi. 29Kuamah in ama sa mah aho ngei kei, Khrist in saptuamte avak a adeihthoh bang in, avak in adeihthoh zaw hi; 30ama sa leh guh a pan a om, apumpi hiangte i hi ngal ua. 31Huaiziak in pasal in anu leh apa paisan in azi alen tinten ding a, anih un sapum khat ahong hita ding uhi. 32Hiai thuguk athupi hi, himahleh ke'n zaw Khrist leh saptuamte toh kisai ahi ka gen. 33Akoi abang hitaleh, nou lak a kuapeuh in amah a ki-it bang in azi it hen; zi mah in leng apasal zahtak ding in pilvang hen.
Currently Selected:
EPHESATE 5: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
