PHILIPPITE 1
1
Chibai Bukna
1Paul leh Timothi, Khrist Jesu sikhate'n, Philippi a om misiangthou tengteng leh heutute leh upate kiang ah: 2Hehpihna leh khamuanna i Pa Pathian leh Toupa Jesu Khrist a kipan na tung uah om hen.
Paul Kipahthu Genna
3Noute ka hon theihgigena ah ka Pathian kiang ah kipahthu ka gen hi, 4na vek ua ding a kipaktak a thum a ka hon ngetsakna teng ah; 5ani masapen a pan tuni tanpha a tanchinhoih a na kithuahkhawmna ziak ua kipak in. 6Hiai thil mahmah gingta ing; amah nou a nasep hoih panpa'n Jesu ni tanpha in azoukim vek ding hi. 7Na vek ua tungtang thu a, ke'n hichibang lungsim ka neih adik ahi, ka lungtang a ka hon neih ziak in; ka kolbutna leh tanchinhoih gupna leh hihkipna thu a hehpihna ka tanpihte na hi vek uhi. 8Khrist Jesu hehpihna nou ngiingei ah nou ka hon ngai mahmah chih Pathian in ahon theihpih hi.
9Noute theihna leh theihkakna toh kithuah itna a na khan semsemna ding un ka thum hi. 10Huchi a thil hoihpen na deih ua, Khrist ni a siangthou leh dembei a na omtheihna ding uh leh, 11Pathian thupina leh pahtawina ding a, Jesu Khrist ziak a hong om dikna gahte na dimtheihna ding un.
Paul Suangkul Tanna Ziakte
12Unaute aw, tu in ka tung a thil hong tungte, tanchinhoih akhanna dia hong tung ahi uh chih na theih uh ka deih; 13huchi in inpi vengpawl tengteng leh adang tengteng kiang ah Khrist ziak a kolbun ka hi chih achiangta hi. 14Ka kolbuhna a kipan a Toupa muanna nei in unaute lak a tampite lau lou a Pathian thu gen ding in nakpitak in ahong hangsan deuhdeuhta uhi.
15Khenkhatte'n hazatna ziak leh thangpaihna ziak in Khrist atangkoupih ua; khenkhatte'n hoih asak ziak un agen uh. 16Pawl khatte'n itna ziak in, tanchinhoih dikdan gen dia om ka hihdan thei in agen uhi. 17Himahleh pawl dang in kikhenna ding in Khrist atangkoupih ua, ataktak hilou in ka kolbuhna a ka thuakna behlap tum in.
18Bang apoi a? Kong bangkim a Khrist akigenkhiak photleh akhem hi in atak hitaleh, huai ah ka kipak hi. Ahi, ka kipak zel lai ding hi.
Khrist A Hinna Leh Sihna
19Na thumnate uh leh Jesu Khrist Kha panpihna ziak in hiai ka suahtakna hong suak ding chih ka thei hi. 20Ka gintak taktakna leh ka lametna bang in bangmah ah hihzum in ka om kei hial dia, himahleh ahi gige sa mah bang in tu in leng ka hinna hiam ka sihna hiam in ka pumpi ah hangsanna kim toh Khrist hihlet in a-om ngeingei ding hi. 21Kei a ding in zaw hin Khrist ahi a, huan sih leng punna ahi. 22Himahleh sa a hin ka tan ding hitaleh kei a ding in sepgim gah tampi suahna ding ahi. Hinapi in ka tel ding pen ka thei kei. 23Nih kalteh in hamhaihtak in ka om hi. Paimang a Khrist kiang a om utna ka nei a; huai lah nakpitak in ahoihzaw ngal a. 24Himahleh noute ziak in sa a om phot akiphamohzaw hi. 25Huchi in hiai ginna ka neih ziak in, ka om phot ding chih ka thei; ginna a na khanletna ding uh leh na kipahna ding un, na vek ua lak ah ka om phot ding hi; 26huchi a na kiang ua ka hong pai nawn ding ziak a Khrist Jesu na suanna ding uh tam semsem kei a na neihna ding un.
27Na omdan uh Khrist tanchinhoih toh kituaksak photphot un; hong hoh a, nou hong muh hiam, ahihkeileh ka om louh a leng kha khat a na dinkipdan uh leh lungsim khat nei a tanchinhoih thugin a na pandan uh, na tanchin uh ka zaktheihna ding in. 28Huan bangmah ah na melmate uh hihlau in om kei un. Huai amau a ding in manna ding kichetna teltak ahi a, himahleh nou a ding in hotdamna ding kichetna ahi, huai Pathian a kipan ahi. 29Hiai tuh noute a ding in phal ahita; Khrist gingtate kia hilou in, ama ziak in na thuak sam ding uh. 30Keimah a na muh uleh na zak uh huai kidouna mah na dou ding uh ahi.
Currently Selected:
PHILIPPITE 1: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
