EPHESATE 4
4
Pumpi Kipum khatna
1Huaiziak in noute sap a na omna uh toh kikhawm a khosa ding in kei Toupa a hentapa in ka hon ngen hi. 2Kingaihniamna leh migitna tengteng, kuhkalna toh, itna a kithuakzou chiat in, 3lemna Kha a kipum khatna vom tinten ding in. 4Ahon sapna pen lametna mun khat a sap na hih mah bang un pumpi khat leh Kha khat kia a-om hi. 5Toupa khat, ginna khat, baptisma khat, 6bangkim Pathian leh Pa khat kia a om a; amah bangkim tung a om a, bangkim mu suak leh bangkim sung a om ahi.
7Himahleh Khrist thilpiak tehna bang zel in hehpihna i kiang chiat uah piak in a-om hi.
8“Huaiziak in ahi, tunglam a akahtouh lai in matte tampi api a,
mihingte kiang ah leng thilpiakte apia,” achihna.
9Huchi in “Akahtou,” chih lei mun nuainungpente bang a ahong suk masak phot keileh bangchi ahita dia le? 10Hong suk pen thil tengteng ahihdim theihna ding in, van tengteng tung pek a kahtoupa mah ahi. 11Huan khenkhatte sawltak hi ding in, khenkhatte zawlnei hi ding in, khenkhatte tanchinhoih gen ding in, khenkhatte pastor hi ding in, khenkhatte sinsaktu ding in apia hi. 12Hiai tuh misiangthoute thopna ding, nasepna sepna ding, Khrist pumpi lamtouhna ding in. 13Huai tuh ginna leh Pathian Ta theihna lam a thukituak a, piching a, Khrist taangchinna bang a i vek ua i om masiah a ding ahi. 14Huchi a mihingte diklouhna khemna bang a lepchiahpil a khem tawmtawm a om a, thuhilhna huih chiteng a alanglang a sep leh mutleng naupang i hih nawnlouhna ding un. 15Itna a thutak gen a, bangkim a amah lupen, Khrist ngei a i khanlet zawkna ding uh ahi. 16Amah a kipan pumpi tengteng kizopna chiteng sep ziak a lemtak a suktuah leh kizomkhawm a, hiang chih in sepdan ding bang asep chiang in pumpi akhang a itna ah amah-le-amah akilamtou hi.
Khrist A Hinna Thak
17Tu in hiai Toupa ah ka hon theisak hi, Zentelte alungsim ginatlouhna uh pu a a-om bang un, na om nawn mahmah ding uh ahi kei hi. 18Amau alungtang uh khauh ziak a theihtheihna nei lou in Pathian hinna theihtheihna a pan posiah in a-om ua; atheihtheihna uh hihmial in a-om uhi. 19Akhenggawpta ua, siang lou chiteng hihna lam a huaiham in zautatna ah akipumpiak uhi.
20Himahleh nou zaw huchibang in Khrist thu na zil kei uhi! 21Athu za a amah a thuhilh a om khin na hih peuhmah uleh, Jesu a thutak a om bang in, 22na pianken lui uh, na nidanglai hindan uh segawpsa suahkhia in, 23na lungsim Kha uah athak in hong om unla, 24pianken thak, diktatna leh sianthouna a Pathian batpih a siam pen silh un.
Niteng Omdan Ding
25Huchi in zuaugen tawpsan in, noumau inveng chiat kiang ah thudik gen un; khat-le-khat kihiangtuah chiat lah na hi ngal ua. 26Heh unla, khelh zaw khial kei un; na hehna uh ni in tumpih kei hen. 27Diabol leng mun awn sam kei un. 28Guta in gu nawn kei hen; tasam kiang a piak ding aneihtheihna ding in, akhut a thil hoih sem in gim zaw hen. 29Thusia peuhmah na kam ua kipan in pawt kei hen; akhawkdan bang zel a bawlhoih ding in thuhoih peuhmah pawt zaw hen, angaikhete a ding a hehpihna ahong hihtheihna ding in. 30Huan Pathian Kha Siangthou hihlungkham kei un, tatna ni a ding in amah ah chiamteh na hi uhi. 31Khaatna bang, thangpaihna bang, hehna bang, hanna bang, gensiatnate leh gitlouh tupna chiteng toh tawpsan in om hen. 32Huan kihehpihtuah chiat a lainatna nei in om unla, Pathian in Khrist a nou ahon ngaihdam bang in, noumau leng kingaidamtuah chiat un.
Currently Selected:
EPHESATE 4: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
