EPHESATE 2
2
Sihna A Pan Hinna
1Nou leng na tatlekna uleh na khelhnate uh ziak a si na hih lai un ahon hihhing hi. 2Huaite ah tuma lam in hiai khovel dan bang in, huihkhua a thuneipa, tua thumang lou tate sung a semlelpa kha deihdan in na khosa uhi. 3Huai thumang lou tate lak ah eite leng tuma lam in sa duhgawlna hih in, i tak taksa utnate bang in i om vek ua, midangte mah bang in thangpaihna ta a piang i na hi uhi.
4Himahleh zahngaihna hau Pathian in, itna thupitak a hon it ziak in, 5tatleknate ziak a si i hih lai in Khrist toh ahon hihhing a, hehpihna a hotdam na hita uhi. 6Khrist Jesu ah amah toh ahon kaithou a, van munte ah amah kiang ah ahon tukhawmsak hi. 7Huchi a hun hong tung dingte a, Khrist Jesu a i tung a migitna nei a, ahehpihna hauhdan a-etsak theihna ding in. 8Hehpihna ziak a ginna tawn a hotdam na hi uhi; huai leng noumau a suak ahi kei a, Pathian thilthawnpiak ahi. 9Thilhih ziak ahi kei, huchi hi keileh mi'n asuang kha ding hi. 10Thil hoih hih ding a Khrist Jesu a siam a om in, ama khutsuak i hi uhi; huai thil hoih hih i khosakna dan ding in Pathian in abawlkhol ahi.
Khrist A Khat Suak
11Huaiziak in tuma lam a nou taksa a Zentelte, taksa khut a zeksum, achihte un zeksum louh hon chihte uh na hi uhi. 12Huai lai in, Khrist lou in Israelte khua-le-tui toh kimidang in khovel ah lametna nei lou leh Pathian lou a om in, thuchiam thukhun lak ah mikhual in na om uh chih theigige un. 13Tu'n bel, Khrist Jesu ah nou nidanglai a gamlapi a omte, Khrist sisan a hihnai in na hong omta uhi. 14Amah i kilemna ahi; ama'n ei nihte khat a siam in i kikal a kimelmakna baang lai ahihchimta hi. 15Thusehte leh dan thupiakte asa a hihmang in; huchi a nihte amah a mihing thak khat a siam a kilemna abawltheihna ding in. 16Huan kros ziak a nihte pumpi khat a Pathian toh hon kilemsakna ding in kimelmakna ahihbeita hi. 17Huan amah ahong pai in, nou gamlapi a omte kiang ah leh naichik a omte kiang ah leng lemna tanchinhoih ahilh sam hi. 18Amah ziak in kha khat a Pa kiang luttheihna i nei tuaktuak uhi.
19Huchi in tu'n zaw, zin-le-leng na hi nawnta kei ua, misiangthoute toh tualsung khat leh Pathian inkuanpihte na hita uhi. 20Khrist Jesu ngei aning a suang kiphamohpen hi in, sawltakte leh zawlneite suangphum tung a lam na hi ua, 21amah ah suanglep tuam chiat kituaktak a suktuah, Toupa ah tempul siangthou asuak hi. 22Amah ngei ah nou leng, Kha a Pathian tenna ding a lepkhawm na hi uhi.
Currently Selected:
EPHESATE 2: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
