KOLOSATE 1

Chibai Bukna

1Paul, Pathian deihdan a Khrist Jesu sawltak leh i unaupa Timothi in, 2Kolossa a Khrist a misiangthoute leh unau muanhuaite kiang ah, Pathian i Pa kiang a kipan hehpihna leh khamuanna na kiang uah om hen.

Kipahthu Genna Leh Thumna

3Nou a ding a thum gige in Pathian i Toupa Jesu Khrist Pa kiang ah kipahthu ka gen uhi, 4Khrist Jesu na gindan uh leh misiangthou tengteng tung a itna na neihdan uh ka zak tak ziak un. 5Huai bel nou a ding a lametna van a koihkholh a a-om ziak ahi. Huai lametna tanchin mah tuma in, tanchinhoih thutak na zata uhi. 6Huai tanchinhoih tuh khovel tengteng ah gah a akhan zel mah bang in na kiang uh ahong tung a, Pathian hehpihna na ngaihkhiak ua na zak ni ua kipan in, noumau ah leng gah in akhang zel hi. 7Huchibang in Epaphras i sikha hihpih ngaihtak lak a na zil bang un, amah kou sik in Khrist nasempa muanhuai ahi. 8Ama'n Kha a na itna uh ahon hilh hi.

9Huaiziak in ka zak ni ua kipan kou leng noute a ding in thum leh nget ka tawp kei uhi; huchi a khalam pilna leh theihna tengteng a adeihlam theihna a hihdim a na hong omtheihna ding un. 10Huan nasep hoih chiteng a gah a, Pathian theihna a khang a, ama kipah lam a Toupa a dia kilawm a na hintheihna ding un. 11Kipahna toh kithuah thuakhatna leh kuhkalna nei ding in, ahatna thupi bang zel a hihhat in hong om un. 12Vak a misiangthoute gouluahpih dia hon chingsak Pa kiang a kipahthu gen in. 13Ama'n mial thuneihna lak a kipan hon suaktasak in, a Tapa ittak gam ah hon kaisakta hi. 14Amah ah i tatkhiakna leh khelhnate ngaihdamna i mu uhi.

Khrist Tungnunna

15Amah muh theih louh Pathian batpih, thilsiam tengteng a piang masapen ahi. 16Amah ah bangkim siam ahi a, van a omte leh lei a omte, muhtheihte leh muh theihlouhte, laltutphahte, thuneihnate, vaihawmnate leh thilhihtheihnate hitaleh bangkim ama siam ahi, amah a ding mah a siam ahi. 17Huan amah zaw bang teng om ma in leng a-om hi, amah ah bang teng adingkhawm chiat uhi. 18Amah tuh pumpi, saptuam lutang ahi a; bangkim a tungnungpen ahong hihtheihna ding in abulpi, misi lak a kipan piang masapen ahi. 19Amah ah Pathian taangchinna tengteng a om Pa deihlamtak ahi. 20Ama kros sisan a lemna abawl in amah ah bangkim amah toh akilemsak a; amah ngei ah lei a thil omte leh van a thil omte leng amah toh akilemsakta hi.

21Huan nou tuma lam in na lungsim uah amelma na hi ua, na thilhih gilou ua amah a kipan a khen a om na hi uhi, himahleh tu in ama'n amah toh hon kilemsakta a; 22asihna in apumpi ah amah toh noute ahon kilemsakta hi, ama a siangthou, gensiatbei leh mohsak theih louh a ahon dinsak theihna ding in, 23kingakna nei a kiptak a om a, tanchinhoih na zak ua lametna a kipan a suanmang a om lou a, ginna a na om gige peuhmah uleh; huai tanchinhoih van nuai a thilsiam tengteng lak a tangkoupih ahi a; kei Paul leng huai nna sem ding a bawl ka hi.

Paul Sepgimna

24Nou ziak a tu a ka gimthuaknate ah ka kipak hi; huan apumpi ziak a Khrist in agimthuaknate ban zom zel ka hi; huai tuh Saptuam ahi. 25Nou a ding a Pathian nasepna kei kiang a piak a om bang zel in huai saptuam nasempa ka hong hita; Pathian thu bukimtak a theisak ding in. 26Huai Pathian thu tuh tangtawn leh akhang-akhang a kipan a thuguk kisel ahi; tu in bel misiangthoute kiang ah latsak in a-omta hi. 27Amau kiang ah, Zentelte lak a huai thuguk thupina hauhsakna atamdan Pathian in theihsak a-ut him ahi; huai thuguk tuh Khrist noumau a om, thupina lametna pen ahi. 28Michih Khrist a hoihkim a ka piaktheihna ding un michih hilh in, pilna chiteng a zilsak in, atanchin ka gen zel uhi. 29Huchibang ding in nakpitak a keimah a asepsak thahatna tengteng zang in theihtawp in ka sem zel hi.

Currently Selected:

KOLOSATE 1: PAITBSI

Highlight

Copy