NASEPTE 2
2
Kha Siangthou Tunna
(Joe 2.28-32)
1Pentikost ni ahong tun in, avek un mun khat ah a-omkhawm uhi. 2Thakhat in van a kipan huihpi nung bang in ging ahong om guih a, huchi in huai in atutna inn uh ahihdim vekta hi, 3leite amah-le-amah mei bang a kihawm in, alutung uah ahong tuang chiat hi. 4Huchi in avek un Kha Siangthou in aluahdimta a, Kha in hihtheihna apiak a apausak bang zel in pau dangte in apauta uhi.
5Huan van nuai nam chih lak a kipan Pathian limsak Juda kulmutte Jerusalem ah a-om uhi. 6Huan ging husa azaktak un mipi ahong kikhawm ua, michih in apau uh amau pau chiat a azak ziak un alungsim uh ahong buai hi. 7Huan avek un amangbang ua, lamdang asa mahmah uhi, “En dih uh, hiai a pau tengteng Galili gam a mi ahi kei ua hia? 8Bangchi in ahia i vek ua pianpih pau chiat a i zak uh? 9Eite Parthai nam, Medes nam, Elam nam; khenkhat Mesopotamia gam a om, Judia gam a om, Kappadosia gam a om, Pontas gam a om, Asia gam a om, 10Phrigia gam a om, Pamphilia gam a om, Aigupta gam a om, Kurini kho kiang a Libia gam a om i hi ua; khenkhat Rome a pan mikhualte, Judate leh aphungkaite uh toh i hi ngal ua, 11khenkhat Krit tuikulh leh Arab gam a mite i hi ngal ua; himahleh, Pathian thilhih thupite agen uh eimau pau chiat in i za ngal ua!” achi uhi. 12Huan avek un lamdang asa mahmah ua, akhiakna dan thei lou in, “Hiai bangchidan ahia?” akichi uhi.
13Khenkhat in, “Uain thak akham ua ahi,” chi in anuihsan uhi.
Peter Thugen
14Himahleh Peter in sawm-le-khatte toh dingkhawm in, aw ngaihtak in akiang uah agen a, nou Judia gam a mite aw, nou Jerusalem a om tengteng aw, hiai thei unla, ka thu leng ngaikhia un. 15Hiaite na gin bang un akham kei uh, dak thumna hun ahi. 16Hiaite zawlnei Joel in agen ahi zaw:
17“Pathian in, ni nanungte ah
hichi ahi ding,
mi tengteng tung ah ka kha ka sungbo ding a;
na tapa leh na tanute'n ka thu ahilh ding uh;
na tangvalte un kilaknate amu ding ua, na putekte un mang anei ding uh.
18Ahi, huai ni in ka sikhapate,
ka sikhanute tung ah leng ka Kha ka sungbo ding a,
ka thu agen ding uhi.
19Huan tunglam van ah thillamdang nuailam lei ah chiamtehna ka musak ding a;
sisan, mei, meikhu hu toh,
20Nisa mial asuak ding a,
kha sisan asuak ding,
Toupa ni thupitak leh lauhuaitak ahong tun ma in.
21Huan hichi ahi ding a,
Toupa min lou peuhmah hotdam in a-om ding hi.
22“Nou Israel mite aw, hiai thu za un: Nazaret Jesu, Pathian in amah zang in na lak uah thil thupite, thillamdangte, chiamtehnate ahih in ahon theichiansak hi; nou ngei in tuate na theichian uhi. 23Huai mi Pathian' tupkholhsa leh theihkholh bang in na mansak ua, nou migiloute khut a kilhden in na hihlumta uhi. 24Amah, Pathian in sihna thuaknatna phelsak in, akaithouta a; ama sihna letdet vual ahih louh ziak in. 25Huan David in athu agen a,
‘Ka ma ah chik lai peuh in
Toupa ka mu gige hi.
Ka mangbatlouhna ding in ka taklam ah a-om hi.
26Huaiziak in ka lungtang anuam a, ka lei leng akipak a,
ka sa lamentak in a-om behlap lai hi.
27Misikhua ah ka kha na nuse kei ding a,
muatna na Mi Siangthou na musak sam kei ding hi.
28Nangma'n hinna lampite na hon theisak a;
nangma'n na mel in kipak in na hon hihdim ding,’ ” chi in.
29“Unaute aw, chikhahpa David thu lau lou in na kiang uah ka gen thei hi; amah zaw asi a, vui leng avui khinta ua, ahan leng tutan in i kiang ah a-om lai hi. 30Amah tuh zawlnei ahi a, Pathian in akhal a mi kuahiam sadan a achite lak a mi khat Khrist laltutphah a tu ding in akaithou ding chih kichiam in agen chih athei hi. 31Huchi in huai tuh atheihkholh him ziak in Khrist thohnawn ding thu agen hi,
‘Misikhua a nutsiat in a-om kei a,
aluang leng amuat sam kei hi,’ ” chi in.
32“Pathian in Jesu akaithouta chih theihpihte i vek un i hi uhi. 33Pathian khut taklam ah pahtawi in a-om a, Kha Siangthou chiam Pa kiang a kipan in amu a, na muh uh leh na zakte uh ahon sunbuak ahi uhi. 34David zaw van ah akahtou kei, amah ngei in,
Jehovah in ka Toupa kiang ah,
35‘Na melmate na khepek ngakna dia ka bawl masiah,
Ka taklam ah tu kinken in,’ ” achi, ana chi hi.
36“Huchi in Jesu, na kilhden uh, Pathian in Toupa leh Khrist hikhawm in abawlta chih Israel inkuan chih in kichiantak in thei uhen,” achi hi.
Piangthak Masate
37Huan huai thu azak un alungtang ua sut bang ahong hi ua, Peter leh sawltak dangte kiang ah, “Unaute aw, bangchi in ka hihta ding ua?” achi ua.
38Peter in akiang uah, “Na khelhnate uh ngaihdamna ding in lungsim khek unla, Jesu Khrist min in baptisma tang chiat un; huchi in Kha Siangthou thawnpiak na tang ding uhi. 39Achiam nou a ding, na tate uh a ding, gamlapi a mi tengteng a ding leh Toupa i Pathian in akiang a asap peuhmahte a ding ahi,” achi hi.
40Huan thudang tampi in ahilhchian a; hiai khang thulimloute lak ah kihumbit un, chi in ahanthawn hi. 41Huan athu zui peuhmah in baptisma atang ua, huai ni in mi sangthum vel behlap in a-om uhi. 42Huan sawltakte thusinsakte sin in, kithuah in, tanghou balkham in, thum in, phatuamngaitak in a-omkhawm uhi.
Saptuam Masate Hihna
43Huan michih in alauta ua; sawltakte'n thillamdang leh chiamtehna tampi ahih uhi. 44Agingta peuhmah in bangkim akikopkhawm uhi. 45Agoute uh, athil neihte uh azuak ua, adeihdong ching lel chiat in avek ua kiang ah ahawm zel uhi. 46Huan niteng in, lungsim mun khat in, tempul ah phatuamngaitak in a-om zelzel ua, a-innte uah leng tanghou balkham in, nuam leh lungkim in, a-an uh ane zel uhi. 47Pathian aphat ua, mi tengteng deihsak in a-om uhi. Huan ahotdam lel peuhmah Toupa'n niteng in akiang uah abehlapsak zel hi.
Currently Selected:
NASEPTE 2: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
