NASEPTE 1
1
Thumakai
1Theophilas aw, tuma a ka laigelh ah, Jesu thilhih leh athuhilh pat tung tengteng thu ka gelh hi. 2Kha Siangthou tawn a asawltak telte kiang a thupiak tampi apiak khit a van a pitouh a a-om ni tan a thute ahi. 3Huai sawltakte kiang ah gimna athuak nung in theihna zuau lou tampi in ahing in akimusak a, ni sawmli hial akiang uah akilak a, Pathian lalgam thu agen hi. 4Huan a-omkhawm uh akithuahpih a, “Jerusalem khua paisan kei un, Pa thilchiam ka gen na zak uh ngak un, achi tinten hi. 5Johan in tui in abaptis zel a, himahleh, ni sawt lou nung in Kha Siangthou a baptis in na om ding uh,” achi hi.
Jesu Vankahna
(Mar 16.19-20; Luk 24.50-53)
6Huan amaute ahong kikhop un akiang ah, “Toupa, tu in hia Israelte kiang a lalgam na piak nawn ding?” chi in adong uhi.
7Ama'n akiang uah, “Pa in ahun leh ani amah thuthu a om dia aseh, nou theih ding ahi kei hi. 8Himahleh, Kha Siangthou na tung ua ahong tun chiang in thilhihtheihna na nei ding uh; huchi in Jerusalem ah, leh Judia gamsung pumpi ah, leh Samaria leh kawlmong pha in ka theihpihte na hi ding uh,” achi hi. 9Huai thu agen khit in amuh laipi un, van a pitouh in a-omta a, meipi in amuh phak louh uah apitouta hi.
10Huan apaitouh lai a van lam a-et nilouh lai un, ngai in, mi nih, puanngou silh in, akiang uah ahong dingh uhi. 11Huai mite'n, “Galili gam a mite aw, bangziak a van lam en a dingh na hi ua? Hiai Jesu na kiang ua kipan a van apitouh a om, van a paitou na muh bang un amah mah ahong kik nawn ding,” achi uhi.
Nungzuite Kithuahkhawmna
12Huan Olive tang achih ua kipat Jerusalem ah akik nawnta uhi. Huai tang Jerusalem kho kiang ahi a, Sabbath ni a hohna hun lel ahi. 13Huan alut un, a-omna dantan tungnung uah apaitou ua, Peter leh Johan, Jakob leh Andru, Philip leh Thomas, Bartholomai leh Matthai, Alphai tapa Jakob, Simon Zealot Pawl a leh Jakob tapa Judas toh ahi uh. 14Huai tengteng numei kuate hiam leh Jesu nu Mari toh, Jesu unaute toh, lungsim mun khat a, phatuamngaitak a thum in a-om nilouh uhi.
Mathia Sehna
(Mat 27.7-8)
15Huan huai ni in unaute lak ah Peter adingh a, avek un za-le-sawmnih ahi uhi. 16“Unaute aw, Kha Siangthou in, David kam a, Jesu mante makai Judas thu agenkholh Laisiangthou thu ahong tung ding him ahi.” 17Amah zaw i lak ua simtel ahi a, hiai nasepna ah tan leng anei sam hi.
18Himahleh huai mi'n akhelhna man in mun khat alei a, akhuplam in akia a, alai ah apuakkham a, agil tengteng alawt vek hi.
19Huai thu Jerusalem a omte tengteng in ana za uhi; huchi in huai mun amau pau in, Akeldama, achi ua, huai tuh Sisan Mun, chihna ahi.
20“Sam Laibu ah hiai thu gelh ahi.
‘A-omna mun hihgam in om hen,
asung ah kuamah om kei hen,’
‘huan aheutu hihna
midang in tang hen,’ chih ahi.
21“Huchi in Toupa Jesu i lak ua lut zel pawt zel a a-om sung teng a, 22Johan baptisma nungsiah, i lak ua kipan van a pitouh a a-om ni tan hiai hon kithuahpihte lak a mi khat athohnawnna theihpih ding in a-om ding ahi,” achi hi.
23Huan mi nih asepkhia ua, khat Joseph Barsabbas kichi ahi a, aminkhem Justas leh midang khat Mathias ahi.
24Huan athum ua, “Toupa, Nang, mihing tengteng lungtang thei, hiai nihte akua zaw pen ahia na tel hon hilh in, 25Judas in amah omna a pai ding in hiai nasepna leh sawltakna akiaksan sik a ding in,” achi uhi. 26Huan ai asan ua, a-aisan uh Matthias tung ah atu a; huchi in amah sawltak sawm-le-khatte lak a simtel ahita hi.
Currently Selected:
NASEPTE 1: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
