NASEPTE 3
3
Khebai Hihdamna
1Huan Peter leh Johan, dak kuana ah thum hun lai in tempul a lut ding in ahohtou uhi. 2Piching kuahiam apian tung a pan khebai ahon zawng ua, tempul a lutte kiang a khutdoh ding in, tempul Kongkhak Kilawm kichi bul ah niteng in alumsak uhi. 3Peter leh Johan tempul a lut ding mu in khut adoh hi. 4Peter in amah a-en gegu a, Johan in leng; huan Peter in, “Hon en in,” achi hi. 5Ama'n amau a pan banghiam muh akilamen a, a-en pah hi. 6Himahleh Peter in, “Dangka leh dangka-eng bangmah ka nei kei; himahleh ka neihsun ka hon pe ding, ‘Nazaret Jesu Khrist min in khe in paita in,’ ” achi hi. 7Huan akhut taklam alen a, akaithouta a; huchi in thakhat in akhete leh asiakmit guhte ahong hat pah hi. 8Amah atawmtou a, adingh a, khe in apai pah hi. Khe a paipai, diangdiang leh Pathian phat kawm in tempul ah alut hi. 9Huan khe a pai leh mi tengteng in Pathian aphat lai amuh un; 10Tempul Kongkhak Kilawm bul a khutdoh a tupa ahi chih athei ua; atung a thil tunglamdang asa mahmah ua, abuaipih uhi. 11Huan ama'n Peter leh Johan alet lai in, mi tengteng in lamdang asa mahmah ua, inlim Solomon a achih uah akiang uah ahong taikhawm uhi.
Tempul A Peter Thugen
12Peter in huai amuh in, mite ahoupih a, “Nou Israel mite aw, hiaite bangziak a lamdang sa? Koumau thilhihtheihna leh Pathian ka limsak ziak ua amah ka paisak bang zen ua bang achia hon en gige? 13Abraham, Isak leh Jakob' Pathian, i pipute Pathian in, asikha Jesu apahtawita ahi; amah na mansak ua, Pilat in khah atup hun in leng ama ah na ut kei uhi. 14Mi Siangthou leh Dik na deih kei ua, tualthatpa na kiang ua piak na ngen zawta uhi. 15Hinna Siampa na that ua; himahleh Pathian in amah misi lak a pan akaithou nawn a; huai theihpihte ka hi uhi. 16Ama min gintak ziak in amin in hiai mi na muh uh leh na theih un ahihhatta hi. Amah ziak a ginna ahong om in na vek ua mitmuh in ahihdam vilvelta hi.
17“Himahleh unaute aw, na heutute un atheih louh ziak ua ahih bang un, na theih louh ziak un hiaite na hih uh ahi, chih ka thei uhi. 18Himahleh Pathian in zawlnei tengteng kam in, Khrist in gim athuak ding thu atheikholsak hi, huchibang in atungsak zawta hi. 19Huaiziak in na khelhnate uh thaimanna ding in kisik unla, kihei nawn un, huchi in Toupa a pan halh hun ahong tung ding hi. 20Khrist Jesu nou a dia aseh mah leng, ahon sawl ding hi. 21Himahleh Pathian in thil bangkim abawlhoih hun ahong tun masiah amah van a a-om ding him ahi; huai bawlhoih ding thu Pathian in leilung pian tung a kipan azawlnei siangthoute kam a agen khit ahi. 22Mosi ngei in ‘Toupa Pathian in keimah ahon bawl bang in na unaute lak ah zawlnei khat ahon bawlsak ding; ama'n thu tengteng na kiang ua agen peuh na ngaihkhiaksak ding uhi. 23Huan mi kuapeuh huai zawlnei thu ngaihkhiaksak lou tuh, mi lak a kipan hihmangthang ahi ding,’ achi hi. 24Ahi, Samuel om a kipan zawlnei tengteng, anung ua mite toh, thugen peuhte'n, tulai tanchin agenkhol uhi. 25Noute zawlneite leh thukhun tate na hi ve ua; Pathian in Abraham kiang ah, ‘Na suante ziak in khovel a nam chih avualzawl ding uh, chi in na pipute uh kiang ah achiam hi. 26Pathian in a Tapa Jesu, misi lak a kipan kaithou in, na khelhnate uh kiheisanna ding leh kisik mite vualzawl ding in noumau kiang ah ahon sawl masapen hi,’ ” achi hi.
Currently Selected:
NASEPTE 3: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
