NASEPTE 13
13
Paul Leh Barnabas Sawlkhiakna
1Antiok a saptuam omte lak ah zawlnei leh thuhilhmi kuate hiam a-om ua; huaite Barnabas, Niger achih uh Simeon, Kurini khomi Lusias, kumpipa Herod toh khangkhawm Manaen leh Saul ahi uhi. 2Huan Toupa nna sem a an angolh lai un, Kha Siangthou in, “Barnabas leh Saul ka sapna nna sem ding in kei a ding in hon koihtuamsak un,” achi hi.
3Huchi in an angawl ua, athum khit un atung uah akhut uh akoih ua, apaisakta uhi.
Kupra Tuikulh Ah Paul Leh Barnabas
4Huchi in Kha Siangthou sawlkhiak in apai ua, Seliusia ah ahohsuk ua, huai a kipan in Kupra tuikulh ah long in apai uhi. 5Salamis a a-om lai un Judate sinagog ah Pathian thu agen ua; Johan leng amaute panpih ding in atonpih uhi.
6Huan tuikulh gam Paphos kho pha in anawksuak ua, bumsiam, zawlnei tak lou, Juda mi khat amu ua, amin tuh Bar Jesu ahi. 7Huai mi gam-ukpa Serjia Paulus, mipiltak kiang a om ahi. Huai gam-ukpa'n Barnabas leh Saul asam a, Pathian thu zak atum hi. 8Himahleh bumsiam Elimas, (huai tuh ama minkhiakna ahi a), amau nasep dal in ginna a kipan gam-ukpa heimang atum hi. 9Huchi in Saul, Paul leng kichi; Kha Siangthou in adim a, amah a-ensal hi. 10“Nang, mi khem leh huathuai chiteng a dim diabol tapa, diktatna tengteng melmapa aw, Toupa lam diktatte hihsiat na tawp kei ding maw? 11Thei in, tu in Toupa khut na tung ah atu hi, na mit ahong taw ding a, bang tan hiam khovak na mu kei ding,” achi hi. Huchi in khomui leh mial in amah akhuh pah a, khut a kai ding mi zong in amai puampuam hi. 12Huan gam-ukpa'n huai thilhih amu a, Toupa sinsakna lamdang asa mahmah a, agingtata hi.
Pisidia Antiok A Paul Thugen
13Paul, atonpihte toh Paphos a kipan in long in apai ua, Pamphilia gam a Perga khua atung uhi; huai ah Johan in amaute paisan in, Jerusalem ah akiksan hi. 14Himahleh amau Perga a kipan apai zel ua, Pisidia gam a Antiok khua atung uhi; huan Sabbath ni in sinagog ah alut ua, atu uhi. 15Dan leh zawlneite laibu asim khit un, sinagog upate'n akiang uah mi asawl ua, “Unaute aw, mite hanthawnna thu banghiam na neih uleh gen un,” achi uhi. 16Huan Paul adingh a, akhut a zap in agen a, “Israel mite leh Pathian laudan siamte aw, ngai un. 17Hiai Israel chite Pathian in i pipute atel a, Aigupta gam a ataam lai un ahih thupi mahmah a, ban thahat in amaute huai a kipan in apikheta hi. 18Huan kum sawmli gamdai ah athilhihte uh athuak teitei hi. 19Kanaan gam a nam sagihte ahihsiat khit in, agam uh aisan a hawm in, aluah ding un apia hi. 20Huaite nung kum zali-le-sawmnga sung teng, zawlnei Samuel hun tan in vaihawmte ape zel hi. 21Huan huai nung in kumpipa angen ua; Pathian in, Saul kichi, Benjamin nam a Kish tapa, kum sawmli sung amau apia hi. 22Amah asuanmang nung in akumpipa ding un David abawlta hi; Pathian in huai thu theisak in, David, Jesse tapa, ka lungtang bang pumi ka mukheta, ama'n ka deihlam ahih ding,” achi hi. 23Hiai mi suan a kipan in Pathian in athuchiam bang in Israelte kiang ah Hondampa, Jesu kichi ahon dinkhia hi. 24Amah ahong pai ma in Johan in kisikna baptisma thu Israel mi tengteng kiang ah ana hilh masa hi. 25Huan Johan in asep ding azoh kuan in, “Noute'n kei kua na hon sa ua? Amah zaw ka hi kei hi. Himahleh ngai un, ka nung ah mi khat ahong pai dek, kei zaw akhepek a khetuam phel tak leng ka hi kei,” achi hi.
26“Mite leh unaute, Abraham suante leh Pathian laudan siam Zentelte tengteng aw, noute kiang ah hiai hotdamna thu piak in a-omta hi. 27Jerusalem a omte leh amakaite un, amah atheih louh ziak ua siam louh atansak lai un, zawlneite thute Sabbath teng a asimte uh tangtungsak ana hi uhi. 28Asihna ding khop atung a bangmah amuh louh nung un leng, Pilat kiang ah hihlup ding in angen uhi. 29Huan athu zawlneite'n agelhkholh tengteng uh ahihtangtun khit un, sing a kipan in alakhia ua, han ah asialta uhi. 30Himahleh Pathian in misi lak a kipan akaithou nawnta hi. 31Huchi in Galili gam a kipan Jerusalem a amah toh hohtoute kiang ah ni sawtpi akilak a; huai mite mah mi kiang a athu theihpihte ahi uhi. 32Kou leng pipute kiang ah huai thuchiam a Tanchin kipahhuai ka hon puangzak uhi. 33Huchi a Pathian in Jesu akaihthoh, ei atate kiang ah huai thuchiam tuh ahihtangtung hi. Sam nihna ah, ‘Nang zaw ka tapa na hi a, tuni in ka hon neikhia hi,’ chih gelh bang in. 34Muatna mun a pai nawn lou ding in Pathian in amah misi lak a kipan akaihthohdan ding hiai bang in agen hi, David kiang a hehpihna ka chiamte nangmah ka hon pe ding,” chi in. 35“Huaiziak in Sam dang ah, ‘Na Mi Siangthou muatmang na phal kei ding,’ achi behlap hi. 36David zaw, Pathian vai hawmsak bang in ama khang hun a nna asep khit in, a-ihmu a, apipute kiang ah asial ua, amuatmangta hi. 37Himahleh Pathian kaihthoh pen in zaw muatna amu kei hi. 38Huchi in unaute aw thei un; amah ziak in khelhna ngaihdamna thu na kiang ua gen ahi. 39Kuapeuh agingta tuh bangkim ah amah siamtansak in a-om, huai lah Mosi Dan in siamtansak in na om thei kei uhi. 40Huaiziak in pilvang un, huchi lou in zaw zawlneite a agen uh na tung uah ahong tung kha ding hi.”
41“Musitte aw, en un,
lamdang sa unla, mangthang un;
na damsung un nna khat ka sem hi,
huai nna mi'n hon hilh mah le uh,
na gingta kei hial ding uhi, chih,” achi hi.
42Huan apawt un, Sabbath nawn chiang a huai thute gen nawn ding in angen uhi. 43Huan omkhawmte akikhentak un, Judate leh phungkaite Pathian limsak lak a mi tampi in Paul leh Barnabas azui zel ua; amau ana houpih ua, Pathian hehpihna a om gige ding in ahanthawn uhi.
Zentelte Kiang Lam Ngatna
44Huan Sabbath nawn in akhozang phial un Pathian thu ngaikhe ding in ahong kikhawm uhi. 45Himahleh Judate'n mipite amuhtak un ahaza mahmah ua; Paul thugente kalh in agensia uhi. 46Huchi in Paul leh Barnabas in hangsantak in adawng ua, “Pathian thu noumau kiang ah gen masak ding him ahi; himahleh na nial ua, tangtawn a hing tak lou a na kiseh nung un, thei un, Zentelte lam ka ngata uh,” achi uhi.
47Huchibang in Toupa'n thu ahon pia hi, “Zentelte hihvakpa ding in ka hon sep a, kawlmong pha a Hondampa dia na omtheihna ding in, chih gelh bang in,” achi hi.
48Zentelte'n huai thu azak un, akipak ua, Toupa thu apahtawi ua, tangtawn a hing ding a sehkholh peuhmah in agingta uhi.
49Toupa thu huai gam kimvel ah adalhta hi. 50Himahleh Judate'n numei zahtakhuai Pathian limsakte leh kho upate hanthawn in, Paul leh Barnabas soisasak in, agam ua kipan adelhkhia uhi. 51Amau leng atung uah akhepek ua leivui asingkhia ua, Ikoniam ah apaita uhi. 52Huan nungzuite kipahna leh Kha Siangthou in adim chiat uhi.
Currently Selected:
NASEPTE 13: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
