NASEPTE 14
14
Paul Leh Barnabas Ikoniam Ah
1Ikoniam ah Judate sinagog ah alutkhawm ua, thu agen zel uhi, huchi in Judate leh Grik mipi tampi in leng agingtata uhi. 2Himahleh agingta nuam lou Judate'n Zentelte lungsim atokthou ua, unaute ahosak uhi. 3Huaiziak in Toupa ah hangtak a thu gen in huai ah sawt sim a-om uhi. Ama'n chiamtehna leh thillamdangte akhut ua hihsak in, ahehpihna thu atheisak zel hi. 4Himahleh khua a mipite akilangta ua, akhen in Judate agum ua, akhen in sawltakte agum uhi.
5Zentelte leh Judate aheutute uh toh pangkhawm in sawltakte simmohhuaitak a bawl a suang a den atup lai un, 6amau ana thei ua, Likonia gam mah, Listra leh Darbi ah leh akim gam ah ataimang uhi. 7Huai ah tanchinhoih agen zom zel uhi.
Listra Ah Paul Leh Barnabas
8Listra ah khezaw kuahiam atu a, apian tung a pan khebai him ahi a, khe in apai ngei kei hi. 9Huai mi'n Paul thugen angaikhia a; huan Paul in a-en gegu a, damna ding in ginna anei chih athei a, aw ngaihtak in, “Na khe in dingtang in,” achi hi. 10Huan amah atawm a, khe in apaita hi. 11Mipite'n Paul thilhih amuh un, Likonia pau in aw ngaihtak in, “Mihing melpu in i kiang uah pathiante ahong sukta uh e!” achi uhi. 12Amaute'n Barnabas pen, “Jupiter” achi ua, Paul bel thugenpi pen ahih ziak in, “Hermes” achi uhi. 13Huan Jupiter siampu, khopi lutna a atempul om in, bawngtalte leh pakkhigui limte kongpi ah ahon tawi a, mipite toh biakna ding in lat atum uhi.
14Himahleh sawltak Barnabas leh Paul in huai azak un, apuan uh abotkek ua, mipi lak ah adianglut ua, akikou uhi. 15“Pute aw, hiai thilte bangziak a hih na hi ua? Kou leng noumau hindan toh kibang pu, mihing ka hi ve ua le; hiai thil ginaloute na kiheisan ua, van, lei, tuipi leh asung ua om tengteng bawlpa Pathian hing kiang a na hong kiheina ding un tanchinhoih ka hon tun uhi. 16Pathian in nidanglai in nam chih amau lampi chiat zuih aphal hi. 17Himahleh amah theihsakna om lou in akibawl kei, huchi in thil ahihhoih zel a, van a kipan in vuahtui ahon pia a, na lungtang uh nek ding leh kipahna a hihdim gige akei hiam,” achi uhi. 18Huchi in huai thu in mipite'n amaute biakna dia gan agoh ding uh akhamzou teitei hi.
19Himahleh Antiok leh Ikoniam ah Juda mi kuate hiam ahong ua, mipite akhempukta uhi; huchi in suang in Paul adeng ua, si hi a agintak ziak un khua a kipan akaikhia uhi. 20Himahleh nungzuite akim a adin lai un, ahong thou a, khua ah alut nawnta hi. Huan azing in Barnabas toh Darbi ah apaita uhi.
Siria Antiok A Kik Nawnna
21Huan huai khuate kiang ah tanchinhoih ahilh ua, nungzui tampi abawl nung un Listra, Ikoniam leh Antiok khua ah akik nawn uhi. 22Gim tampi thuak in Pathian lalgam i lut ding ahi him ahi, chi in nungzuite lungsim ahihkip ua, ginna a om gige ding in ahanthawn uhi. 23Huan saptuam pawl teng ah upate asehsak ua, an ngawl kawm a athum khit un, agin uh Toupa kiang ah akemsak zelzel uhi.
24Pisidia gam atawnsuak ua, Pamphilia gam atung uhi. 25Perga a thu agen khit un Attalia ah ahohsuk uhi. 26Huai a kipan in long in apawt ua, Antiok khua ahong tung nawnta uhi. Huai mun ahi tua athilhih khitsa uh hih ding a unaute'n Pathian hehpihna a kemsak a asawlkhiakna uh.
27Huan a tun nung un asaptuamte asamkhawm ua, Pathian in, amaute zang a athilhihte leh Zentelte a dia ginna kongkhak ahonsakdan ahilh uhi. 28Huan nungzuite kiang ah sawt sim a-om uhi.
Currently Selected:
NASEPTE 14: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
