NASEPTE 12
12
Martar Jakob
1Huai lai in Kumpipa Herod in saptuamte lak a kuate hiam hihgim tum in akhut alikta hi. 2Huan Jakob, Johan unau, namsau in asatlum hi. 3Huai in Judate akipaksak chih atheih in, Peter leng mat atum zel hi. Huai ni tuh Tanghou Silngou Soh Louh Ni ahi.
Peter Suangkul Tanna
4Huan amat nung in suangkul ah akhum a, sepaih pawl li, li chiat zel in, akivenkhelsak hi; Paikan Ankuanglui nung in mi tengteng kiang ah pikhiak atum hi. 5Huaiziak in suangkul ah Peter a-omsak tadih hi; himahleh, saptuamte'n amah a ding in phatuamngaitak in Pathian kiang ah athumsak uhi.
6Herod in apikhiak ding zan in sepaih nih kikal ah khainiang nih bun in Peter a-ihmu a; avengte kongkhak bul a om in suangkul aveng uhi. 7Ngai in, Toupa angel khat akiang ah ahong dingh a, suangkul sung ah vak ahong tang hi; huan Peter nak ah abenghalh a, “Thou meng in,” achi hi. Huan akhut a kipan khainiangte atolhkhesuk hi.
Peter Hutkhiakna
8Huan angel in akiang ah, “Na puan silh inla, na khetuam bun in,” achi hi. Huan ama'n huchibang in ahih hi. Angel in akiang ah, “Na puan silhhoih inla, hon zui in,” achi hi. 9Huan Peter apawt a azuita hi, angel tatdan atak hia ahih athei kei, mengmu bang a amuh hiam akisa hi. 10Huan chingmi masa leh azom akhen nung un, khopi lutna sik kongpi ava tung ua, huai tuh amau a ding in akihong tawmta hi; huan apawt ua, kongzing khat akheng ua; huai a kipan angel in amah paisanta hi.
11Huan Peter ahalhtak in, “Herod khut leh Juda mite lametna tengteng a kipan a hunkhe ding a Toupa'n a-angel hon sawlkhia ahi chih tu in diktak in ka theita,” achi hi.
12Huan akingaihtuah khit in, Johan, Marka achih uh, huai nu Mari inn ah ava hoh a; huai ah thum in mi tampi ana omkhawm uhi. 13Kongpi kongkhak a kiuhtak in, nungak khat amin Rhoda, adawng ding in ava hoh hi. 14Peter aw azaktak in akipah ziak in kong hon lou in atailut nawn a, kongkhak bul ah Peter adingh chih ava gen hi. 15Himahleh amau akiang ah, “Ahai na hita ve,” ana chi uhi. Ama'n bel, “Hi petmah ahi,” chi in apang teitei hi. Amau, “A-angel hi in teh,” achi lai uhi.
16Himahleh Peter in kongkhak akiukiu a; ahon ualeh amah amu ua, lamdang asa uhi. 17Huchi in ama'n amaute dai ding in akhutvan a, Pathian in suangkul a kipan amah apikhiakdan ahilhta hi. “Hiai thute Jakob leh unaute kiang ah va hilh un,” achi hi. Huan apawt a mun dang ah ava pai hi.
18Ni ahong suahtak in, Peter tung a bang thil tung hiam, chi in buai chihtak in sepaihte abuai uhi. 19Huan Herod in amah azong a amu kei, avengtute a-enchian a, thah ding in thu apeta hi. Huan Judia gam a kipan Kaisaria ah ahohsuk a, huai ah a-om nilouh hi.
Herod Sihna
20Huan Tura leh Sidon a mite tung ah Herod alung hi kei mahmah hi; amau thukhat sat in Blastas, kumpipa lupna ngakpa, alawm in abawl ua, kumpipa kiang ah hong pai ua, amah a kipan nek-le-dawn ngah zel ahih ziak un akholamte uh toh kilemna angen uhi.
21Huan ani chiam ni in kumpipa Herod in kumpi puan asilh a, alaltutphah a tu in akiang uah thu agen hi. 22Mi tengteng in, “Hiai pathian aw ahi, mihing aw ahi kei,” achi ua, akikou zuazua uhi. 23Ama'n Pathian kiang a thupina apiak louh ziak in Toupa Angel in amah aman pah a, hut in ane a, asita hi.
24Pathian thu bel adalh a, apung zel hi.
25Barnabas leh Saul in nna asep khit un, Jerusalem a kipan akik nawnta ua, Johan, amin dang Marka achih uh leng atonpih uhi.
Currently Selected:
NASEPTE 12: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
