NASEPTE 11
11
Peter In Athilhih Agum
1Huan Judia gam a sawltak leh unau omte'n Zentelte'n leng Pathian thu agingta uh chih azata uhi. 2Huchi in Peter, Jerusalem atuntouhtak in, zeksumte'n akiang ah, 3“Zeksumloute inn ah lut in, akiang uah na ne,” chi in akalhta uhi. 4Himahleh Peter in abul a kipan in kizom zel in akiang uah ahilhchian hi.
5“Joppa ah thum in ka om a, huan ihmu bang in ka om a, banghiam bawm, puan liantak bang aning li a kikhih, van a kipan khiaksuk bang in ka mu a; ka kiang ngeingei ahong tung hi. 6Huai tuh ka en kilkel a, ka ngaihtuah a, ‘Lei a ganhing khe li nei leh gamsate chi chih, awm a kitholh ganhingte leh tungleng vasate ka mu hi.’ 7Huan aw in, ‘Peter, thou in; gou inla, ne in, hon chi in’ ka za hi. 8Himahleh ke'n, ‘Toupa, hilou e, siang lou leh nin bangmah ka kam ah alut ngei kei,’ ka chi hi. 9Himahleh van a kipan aw in, anihveina in, ‘Pathian in ahihsiangthousa nang siang lou chi ke'n,’ chi in ahon dawng hi. 10Huchibang ngen in thumvei ahong om a; huan bangkim van ah khaitouh in a-om nawnta hi. 11Huan ngai in, mi thum Kaisaria a kipan ka kiang ah ahon sawl ua, ka omna inn kong ah ana dingh nilouh uhi. 12Huan Kha in kuamah khentuam nei lou a amau zui ding in ahon sawl hi. Hiai unau guk in leng ahon zui sam ua, huai mi inn ah ka lutta uhi. 13Huan ama'n ka kiang uah, a-inn a angel kilak amuhdan leh angel in akiang a, Joppa ah mi sawl a, Simon Peter achih uh, pisak ding leh; 14‘Ama'n thu ahon hilh ding a, huai mi thu in nang leh na inkuanpihte hotdam in na om ding uh’ achihdan leng ahon hilh hi. 15Huan thu ka gen patleh, achil a eite tung a ahong tun bang mah in, atung uah Kha Siangthou ahong tungta hi. 16Toupa thu, Johan in tui in abaptis zel; himahleh nou zaw Kha Siangthou a baptis in na om ding uh achih ka hon theikhe nawn uhi. 17Huchi in Toupa Jesu Khrist i gintak ua, Pathian in thilthawnpiak ahon piak amaute kiang a apiak sam, kei Pathian sel vual ka hi a hia?” achi hi.
18Huai thu azak un adaita ua, huchi ahihleh, “Pathian in Zentelte leng hing ding a kisik phalta ahi ve maw,” chi in Pathian aphat uhi.
Antiok Khua A Saptuamte
19Huan Stephen ziak a sawina thuak dalhzakte, Phoinisia gam, Kupra tuikulh leh Antiok khua pha in apai ua, Judate kiang kia ah lou ngal kuamah kiang ah thu agen kei uhi. 20Himahleh alak ua akhen tuh Kupra tuikulh leh Kurini a mite ahi ua, huai mite'n Antiok khua atun un Grikte leng ahoupih ua, Toupa Jesu tanchinhoih ahilh samta uhi. 21Huan Toupa khut in amaute apanpih a; mi tampi in agingta ua, Toupa lam ahong nga chiatta uhi.
22Huan atanchin thu uh Jerusalem a saptuam omte bil ah alutta a; huchi in Antiok kho pha in Barnabas asawlkhia uhi. 23Amah ava tung a, Pathian hehpihdan amuh in akipak a, phatuamngaitak in Toupa len gige ding in avek un ahanthawn hi. 24Barnabas mihoihtak ahi a, Kha Siangthou leh ginna a dim ahi. Huan Toupa kiang ah mi tampi a behlap in a-omta uhi.
25Huan Saul zong ding in Tarsas ah Barnabas ahoh hi. 26Amuh in Antiok ah ahon pi hi. Huan kum khat hilhial saptuamte kikhopna ah apang zel ua, mi tampi leng thu ahilh uhi. Antiok ah ahi nungzuite, “Khristian,” achih masakpen uh.
27Huai lai in zawlnei kuahiam Jerusalem a kipan in Antiok ah ahohsuk hi. 28Alak ua mi khat amin Agabas kichi adingh a, khovel tengteng ah kial thupitak atung dek chih Kha hilh in atheisak a; huai kial tuh Klaudias vaihawm lai in ahong tungta hi. 29Huchi in nungzuite'n atheihdan chiat un Judia gam a unau omte kiang ah panpihna khak atum uhi. 30Huai tuh ahihta ngei uhi, Barnabas leh Saul khut ah upate kiang ah akhak uhi.
Currently Selected:
NASEPTE 11: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
