NASEPTE 10
10
Peter Leh Kornelia
1Kaisaria ah mi khat amin Kornelia a-om a; amah Itali pawl achih uh, huai pawl a sepaih zaheutupa ahi. 2Amah Pathian limsakmi ahi a, a-inkuanpihte tengteng toh Pathian laudan asiam uhi, mite kiang ah thilthawnpiak tampi ape zel a, Pathian kiang ah leng athum gige hi. 3Hiai mi'n sun dak kuana ding khawng in mengmuhna in Pathian angel khat akiang ah alut a, “Kornelia” chi a asap lai chiangtak in amu hi. 4Huan Kornelia in lau in amah ana en kilkel a, “Toupa, bang ahia?” achi hi. Ama'n akiang ah, “Na thumnate leh na thilpiakte theihgigena ding in Pathian ma ah atungtouta hi. 5Tu'n ah Joppa khua ah mi sawl inla, mi khat Simon Peter achih uh va pisak in; 6amah huai tuipi gei a om, savunbawlpa Simon inn a tung ahi a, ama'n na hih ding hon na hilh ding hi,” achi hi. 7Ahoupihpa angel apaitak in, Kornelia in asikhate lak a mi nih leh anek bawl gigete lak a Pathian limsak sepaih khat asam hi. 8Thu tengteng akiang ua ahilh khit in Joppa khua ah asawlta hi.
Peter Mengmuhna
9Huan azing nawn in, khopi zuan a pai, khua atun kuan un, thum ding in dak gukna vel in intung ah Peter akaltou hi. 10Huan agil ahong kial mahmahta a, an nek a-utta hi; himahleh nek ding abawl lai un ihmu bang in zeel in ahong om hi. 11Van kihong in, banghiam bawm, puan liantak bang, ning li a khih, lei a luai a khaikhiak a om in amu hi. 12Huai sung ah leitung a khe li nei ganhing chi chih leh gamsa leh ganhing bokvak, tungleng vasa chichihte a-om uhi. 13Huan akiang ah aw in, “Peter, thou in gou inla, ne in,” achi hi.
14Himahleh Peter in, “Toupa hilou e; siang lou leh nin bangmah himhim ka ne ngei kei,” achi hi.
15Aw in, anihveina in, “Pathian in ahihsiangthousa nang siang lou chi ke'n,” achi hi. 16Huchibang ngen in thumvei ahong om a; huan van ah bawm khaitouh in a-om nawnta hi.
17Huan Peter in mengmu bang a amuh theisiam lou a, abuai lai in, Kornelia mi sawlte'n Simon inn ana kankhia ua, 18kongkhak bul ah ana dingh ua asam ua, “Simon, Peter achih uh, huai a atun leh tun louh,” ana dong uhi.
19Peter in mengmu bang a amuh angaihtuah lai inla, Kha in akiang ah, “Ngai in, mi thum in ahong zong uh. 20Huaiziak in thou inla, kumsuk in, bangmah ginglel lou in amaute zui in; amau ka sawl ahi uh,” achi hi. 21Huchi in Peter huai mite kiang ah ahohsukta a, akiang uah, “Ngai un na mizon uh ka hi; bang ahia na hong nasan uh?” achi hi.
22Amau, “Angel siangthou khat in, Kornelia, sepaih zaheutupa, midiktak, Pathian laudan siam, Juda nam tengteng lak a mihoih kiang ah, na thugen azakna ding in, a-inn ah nangmah sam ding in ahilh hi,” achi uhi. 23Huchi in mite asamlut a, agiaksakta hi. Huan azing in Peter athou a, akiang uah apai a, Joppa khomi unau kuate hiam leng akiang uah apai sam uhi.
Kornelia Inn Ah Peter
24Huan azing nawn in Kaisaria ah alutta uhi. Kornelia in, asanggamte leh alawm deihpente samkhawm in, amau ana ngak nilouh hi. 25Peter ahong lut dek laitak in Kornelia in ana dawn a, akhebul a bokkhup in, abia hi. 26Himahleh Peter in amah akaithou a, dingh in, “Kei leng mihing mai ka hi,” achi hi. 27Amah toh kihou kawm in alut a, mi tampi omkhawm amu hi. 28Akiang uah, “Juda mi namdang toh kithuah leh pai asianlouhdan noumau mah in na thei uhi; himahleh kuamah siang lou leh nin ka chih ding ahi kei chih Pathian in ahon theisak hi. 29Huaiziak in na hong saptak in sel lou in ka hong pai hi. Huchi in ka hon dong ahi, bangziak a hon sam na hi ua le?” achi hi.
30Huan Kornelia in, “Ni li ahita, tu hun bang tan in, ka inn ah, dak kuana hun thumna ah ka thum a; ngai in, ka ma ah puan vaktak silh mi khat ahong dingh a, 31‘Kornelia, na thumna zak in a-omta, mi kiang a na thilthawnpiakte leng Pathian in atheigige hi. 32Huaiziak in Joppa ah Simon, Peter achih uh, sam ding in mi sawl inla, na kiang ah sam in; amah tuipi gei ah savunbawlpa Simon inn a tung ahi, amah ahong tun chiang in na kiang ah thu agen ding hi,’ achi hi. 33Huaiziak in na kiang ah mi ka hon sawl pah hi; na hong pai ahoih ahi. Huchi in Toupa'n thu ahon piak peuhmah thei ding in tu'n ah Pathian mitmuh in i vek un hiai ah i om uhi,” achi hi.
Kornelia Inn A Peter Thugen
34Huan Peter in agen a, “Pathian in mi deihsak tuam anei kei chih, diktak in ka thei hi. 35Himahleh nam chih lak ah kuapeuh amah kihtakdan siam a, diktak a gamta peuhmah, apahtak mi ahi naknak uhi. 36Ama'n khamuanna tanchinhoih, Jesu Khrist tungtawn in Israel suante kiang ah agen a (amah mi tengteng Toupa ahi), 37Johan in atangkou pihpih baptisma nung in, hiai tanchinhoih, Galili gam a kipan ahong thang pan a, Judia gam tengteng ah athangsuak a, noumau leng na thei uhi. 38Nazaret Jesu tungtang thu, huchi a Pathian in amah Kha Siangthou leh thilhihtheihna a athaunilhdan, Pathian akiang a a-om ziak in amah mi tung a thil hoih hih leh diabol gawt tengteng hihdam in avialvak vak hi. 39Judate gam ah leh Jerusalem a athilhih tengteng theihpihte ka hi uh, amah sing dawn ah khai in athat uhi. 40Amah Pathian in ani thum ni in akaithou nawn a, chiantak in akitheisak hi. 41Himahleh mi tengteng kiang ah ahi kei, Pathian in theihpih dia asehkholhte kiang kia ah ahi koute, misi lak a kipan athohnawn nung a akiang a ne a dawnte kiang ah. 42Amah misi leh mihingte tung a Vaihawmpa dia Pathian seh ahi chih, mi kiang a tangkoupih leh theisak ding in Pathian in thu ahon pia hi. 43Kuapeuh amah gingta amin ziak in khelhnate ngaihdam in a-om ding uh chih hiai a tanchin zawlnei tengteng in ana theihsak det uh ahi,” achi hi.
Zentelte Tung A Kha Siangthou Tunna
44Peter in huai thu agen laitak in thuzate tengteng tung ah Kha Siangthou ahong tung hi. 45Zeksumte lak a agingtate Peter hon zui peuhmah in Kha Siangthou thawnpiak Zentelte tung ah leng sunbuak ahih ziak in lamdang asa mahmah uhi. 46Paute a thu gen in Pathian phat in aza uhi. 47Huan Peter in apuang a, “Hiai mite, eimah bang a Kha Siangthou tang sam, baptisma ding in tui zat kuama'n akham thei dia hia?” achi hi. 48Huchi in Toupa min a baptisma tan ding thu apia hi. Huai khit in ni bangzah hiam taam ding in akhou uhi.
Currently Selected:
NASEPTE 10: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
