2 JOHAN 1
1
Chibai Bukna
1Upa in, tel a om numei leh atate thutak a ka it, kei kia hilou a, thutak thei peuhmahte kiang ah; 2thutak eimah a om gige, tangtawn a i kiang ua om gige ding ahih ziak in; 3Pa Pathian a kipan leh Pa' Tapa, Toupa Jesu Khrist a kipan hehpihna, zahngaihna, leh khamuanna in thutak leh itna ah noute hon ompih hen.
Khrist Thupiak Zuihna
4Pa kiang a kipan athupiak i muh bang in na ta kuate hiam thutak a om a ka muh ziak in ka kipak mahmah hi. 5Numei hoih, na kiang a thupiak thak gelh hilou in, atung a kipan a i neih pen gelh zaw in, i ki-ittuah theihna ding in nget petmah in ka hon ngen hi. 6Huan hiai itna ahi, athupiak bang zel a i omna uh. Hiai ahi thupiak atung a kipat ana zak uh, huai ah na om ding uh ahi.
7Jesu Khrist taksa in ahong pai chih gum lou khemmi tampi khovel ah ahong pawtta uhi. Huai mite ahi, khemmi leh Khrist doumi. 8I sepkhiaksate mangsak lou a, akipahman bukim a i muhtheihna ding un, nangmah kivenghoih in.
9Kuapeuh huai Khrist thu sinsakna thu a om gige lou a talek in Pathian anei kei. Huai thu sinsakna thu a a-om gige in Pa leh Tapa aneikhawm hi. 10Kuapeuh huai thu sinsakna thu hon po lou a, na kiang ua ahong paileh na inn uah tungsak kei unla, paukam hoih in kha sam kei un, 11paukam hoih a kha peuhmah athilhihkhelh ah panna anei ngal a.
Thu Nanungte
12Na kiang ua thu tampi gen ding ka neih ziak in lai leh laitui a gelh ka ut kei a; na kipahna uh akimtheihna ding in na kiang ua hong hoh a, kimaituah a kihou ka lamen zaw hi.
13Na sanggamnu tel tate un chibai ahon buk uhi, Amen.
Currently Selected:
2 JOHAN 1: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
