2 TIMOTHI 3
3
Ni Nanungte
1Huan hiai thei in, ni nanung ah hun haksa pipi a hong om ding hi. 2Mi amau ki-itte, dangka deihtate, ki-uangsakte, kisatheite, Pathian gensete, nu leh pa thu mangloute, kipahna dan theiloute, siangthouloute, 3itna pianpih neiloute, buaina bawlte, hekte, kidek theiloute, mihuhamte, hoih deih hetloute, 4zuautatte, kingaisang, thunung khualloute, Pathian it sang a amau kipahna kia itzawte ahi ding uh; 5Pathian limsak batna anei ding ua, himahleh athilhihtheihna ataksang kei ding uhi. Huchibang mite nungngatsan in. 6Amaute lak a khenkhatte inn peuh a lut a gitlouh gik pua numei haideuhte sal a manmante ahi ua, huchibang numeite duhgawlna chi chih a pimang in, 7zilzil napi a, thutak theipha ngeiloute ahi uhi. 8Jannes leh Jambres in Mosi adou bang un, huai mite'n leng thutak adou gige uhi; lungsim sesa ginna lam a Pathian deih louh mi ahi uhi. 9Himahleh huai val ahih kei ding uhi, ahaidan uh Jannes leh Jambres haidan ahong kitheih mah bang in mi tengteng kiang ah hong kilang ding hi.
Timothi Thuhilhna
10Himahleh nang zaw ka thugin, ka omdan, ka thiltup, ka ginna, ka thuakzohna, ka itna, ka kuhkalna na thei vek hi, 11Antiok khua, Ikoniam khua, Listra a ka tung a thil tung ahon sawinate uh, huai sawina ka thuakte; huai tengteng ah Toupa'n hon hunkheta hi. 12Ahi, kuapeuh Khrist Jesu Pathian limsak a om tum photphot in sawina athuak sam ding uhi. 13Migilou leh mikhem hatte mi khem leh khem a om in agilou semsem ding uhi. 14Himahleh nang zaw na zilsa leh kiptak a na gintaksa thutak ah om gige in, kua a kipan na zil hiam chih theigige in. 15Huan Khrist Jesu ginna ziak a hotdamna mu ding a nang hon hilhpil thei Laisiangthoute naupangnou a kipan thei khin na hi chih theigige in. 16Laisiangthou peuhmah Pathian hatkhum a piak ahi a; huaiziak in thuhilhna ding, taihilhna ding, bawlhoihna ding, diktatna lam a kichilna ding in aphatuam hi. 17Huchi a Pathian mipa nna hoih chiteng sem ding a kimtak a kivan a akimtheihna ding in.
Currently Selected:
2 TIMOTHI 3: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
