2 TIMOTHI 2
2
Khrist Jesu Sepaih Hoih
1Huchi in nang ka tapa, Khrist Jesu a hehpihna om ah thilhihtheihna nei in om in. 2Theihpih tampite lak a ka kam a thu na zakte, mimuanhuai, midangte hilhsawn thei dingte kiang ah kemsak in.
3Khrist Jesu sepaih hoih bang in gimthuak hon thuakpih in. 4Sepaih a om ding a atelpa kipahsak ahihtheihna ding in, sepaih kuamah kidou lai in hiai damsung khosaknate in akisubuai ngei kei hi.
Kimawlmi Leh Louneimi A Pan Sinlai
5Huan kidemnate ah mite pang mahleh dan bang a ahihkeileh khuksak in a-om ngei kei hi. 6Louneipa semgim agah tang masapa ahih ding ahi. 7Ka thugentak ngaihtuah in; Toupa'n thil tengteng ah theihsiamna ahon pe ding hi.
8Jesu Khrist, David suan ka tanchinhoih gen bang a misi lak a kipan a thounawnpa theigige in. 9Huai tanchinhoih ziak in thil hihkhialpa bang in hen hial in gimna ka thuak zel hi; himahleh Pathian thu hen in a-om kei hi. 10Huaiziak in Khrist Jesu a hotdamna tangtawn a thupina toh amuh sam theihna ding un, telte ziak in bangkim ka thuak hi. 11Hiai thugen adik hi:
“Asihna a i sih khit ngalleh,
ahinna ah i hing ding hi.
12I thuak leh avaihawmna ah vai i hawm sam ding hi;
amah i kitheihmohbawlleh
ama'n leng hon kitheihmohbawl ding.
13Eite muanhuai lou in om mah
lehang,
Amah zaw muanhuai in a-om gige hi;
amah-le-amah akitheihmohbawl thei ngal kei a.”
Pathian Pomtak Nasemmi
14Hiai theisak inla, thute leltak tung a akisellouhna ding un Toupa muh in phatuamngaitak in theisak in; huai kiselna bangmah aphatuam kei a, angaikhete a ding in siatna ahi zaw hi. 15Nasemtu, zumna ding nei lou, thutak thu diktak a zang, Pathian pomtak hi ding a nangmah kipe ding in theihtawp suah in kisin in. 16Himahleh Pathian zah louh thugen mawkmawkte nungngatsan in; huchibang mite Pathian limsaklouhna lam ah apai gamla semsem ding ua, 17athu un meima sia nek bang in ane zel ding; alak uah Himenaias leh Philetas apang uhi. 18Huai mite'n thohnawnna a-om khinta chi in thutak lam apialsan ua, mi khenkhatte ginna ahihmangsak uhi. 19Himahleh Pathian suangphum kip adingh lai a, hiai chiamtehna anei hi: “Toupa'n ama ate athei,” chih leh, “Toupa min lou peuhmah in diktatlouhna paisan hen,” chih.
20Himahleh inn thupi ah tui-um belsuan dangka-eng leh dangka a bawlte kia a-om kei a, sing leh bellei a bawlte leng a-om hi; khenkhatte manphatak a zat a-om a, khenkhatte manpha lou deuh a zat leng a-om sam hi. 21Huaiziak in mi huai thil manphaloute lak a akihepleh tui-um belsuan manphatak a zat ding, siangthou, apu a dia zat tak, nasep hoih chiteng a dia mansa ahi ding hi. 22Himahleh valnou duhgawlnate taisan inla, lungtang siangthou a Toupa sam peuhmahte lak adiktatna, ginna, itna leh khamuanna delh in. 23Himahleh kidounate asuaksak nak chih thei in, kiselna haihuai leh pil lou ah pang nuam ke'n. 24Toupa sikha in adou ding ahi kei a, mi tengteng tung ah siam tum in, thuhilh siam in, gitlouh tung a thuakzou in, 25amah doute thunuailuttak in athuhilh zaw ding hi. Huchi in Pathian in thutak atheihna ding un akisiksak zenzen kha ding hi, 26huchi in khua ahon theithei ding ua, amaute suak-le-sal a man a a-utut a bawlpa diabol thang a kipan asuakta thei ding uh.
Currently Selected:
2 TIMOTHI 2: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
