1 JOHAN 5
5
Khovel Tung A Vualzohna
1Kuapeuh Jesu, Khrist ahi chih gingta Pathian suahsak ahi; kuapeuh asuaksakpa it in asuahsak leng a-it nak hi. 2Hiai ah Pathian tate i itna ah Pathian i it a, athupiakte i zui chih i thei uhi. 3Pathian i itna hiai ahi, athupiakte i zuihna; athupiakte lah ahaksa ngal kei hi. 4Pathian suahsak peuh in khovel azou zel hi; hiai ahi khovel tung a vualzohna, i ginna uh. 5Jesu, Pathian Tapa ahi chih gingtami kia ngal lou, kua'n khovel azou zel a?
Jesu Khrist Theihpihna
6Hiai ahi tui leh sisan a hong paipa, Jesu Khrist; tui kia ah hilou in, tui ah leh sisan ah ahi zaw. Theisakpa tuh Kha ahi, Kha thutak ahih ziak in. 7Van tung ah theihpih thum a-om, Pa, Thu leh Kha Siangthou ahi ua, amaute khat ahi uhi. 8Leitung ah theihpih thum a-om, Kha leh tui leh sisan; huai thumte akithutuak uhi. 9Mihing theihpihna bawn i sanleh Pathian theihpihna athupizaw hi. Pathian theihpihna tuh a Tapa tanchin atheipihta chih ahi. 10Pathian Tapa gingtami in amah ah theihna anei a, Pathian gingtaloumi in amah zuauthei in abawl hi; Pathian in a Tapa tanchin atheihpih agintak louh ziak in. 11Theihpihna hiai ahi, Pathian in tangtawn hinna ahon pia a, huai hinna a Tapa ah a-om hi. 12Kuapeuh Tapa nei in hinna anei; kuapeuh Pathian Tapa nei lou in hinna anei kei hi.
Tangtawn Hinna
13Tangtawn hinna na nei uh chih na theihna ding un, nou Pathian Tapa min gingtate kiang ah hiai thu ka gelh ahi. 14Hiai pen amah tung a i hangsanna ahi, bangpeuh ama deihlam bang a i ngetleh ama'n ahon ngaihkhiaksak hi. 15Huchi in bangpeuh i nget ahon ngaihkhiaksak chih i theihleh akiang a i thilnget i muta chih i thei hi.
16Kuapeuh in a-unau sihna khop hilou khelhna hih in muleh angetsak ding, huchi in Pathian in an genmi kiang ah sihna tun hilou khelhna hihte a ding in hinna ape ding hi. Sihna tun khelhna a-om a; huchibang lam ah angetsak ding ka chi ahi kei hi. 17Diktatlouhna tengteng khelhna ahi; sihna khop hilou khelhna leng a-om sam hi.
18Kuapeuh Pathian suahsak in thil ahihkhial kei chih i thei hi; Pathian Tapa neihsun in amah akem gige a, giloupa'n khoih leng akhoih thei kei hi.
19Huan eite Pathian a kipan i hi chih i thei ua, khovel pumpi bel giloupa thuthu in a-om chih i thei hi. 20Huan Pathian Tapa ahong pai a, adikpa i theihna ding in theihtheihna ahon pia chih i thei behlap uhi; eite a Tapa Jesu Khrist a i om in adikpa ah i om uhi. Amah tuh Pathian diktak leh tangtawn hinna ahi.
21Naute aw, milim lak ah kihemkhia un, Amen.
Currently Selected:
1 JOHAN 5: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
