2 KORINTHTE 9
9
Misiangthoute A Dia Thilpiak
1Misiangthoute a dia thilpiak thu zaw na kiang uah ka gelh akiphamoh kei hi. 2Na kimandan uh ka thei ngal a, huai lam thu ah zaw nikum in Akhaia gamte kimansa in a-omta uh chi in Masidonia gam a mite kiang ah ka hon na suang zel a; na phattuamngaihna un alak ua mi tampi atok halhta hi. 3Himahleh huai lam thu ah zaw ka hon suanna bangmah lou ahong hihlouhna ding in unaute ka hohsak zel hi; ka gen bangtak a mansa a na na omtheihna ding un. 4Huchi lou in zaw Masidonia gam a mi kuate hiam in ahon zuih zenzen uleh, kiman lou in hong mu le uh, noute kia hilou in noute ka hon ginna uh lam ah kou leng ka zahlak kha ding uhi. 5Huaiziak in unaute bel nou kiang a hong masa a, hoihtak a thilpiak na chiamkholhte uh na bawlkhol ding a, nget kiphamoh in ka gingta hi, laksak teitei bang hilou a phaltak a piak bang zaw a mansa a na omna ding un.
Tuh Bangbang At Chiat Ding
6Himahleh huai lam thu ah zaw, theh tawm in a-at tawm ding a, theh tam in a-at tam ding hi. 7Michih in it pipi a pe lou in, piak louh theih louh a ngaihtuah a pe tuan lou in, alungtang ua atup bang zel un pe chiat uhen; Pathian in kipaktak a pe mite ahi a-it. 8Huan Pathian in hehpihna chiteng in na tung uah avuk thei ahi; huchi in nou bangkim ah ahun ngial nei gige in, nasep hoih chiteng a ding in na hau thei ding uhi;
9“Ahawmzak a;
gentheite kiang ah apia a;
adiktatna tangtawn in a-om gige,” chih gelh bang in.
10Thehpa kiang a achi pepa leh nek ding a tanghou pepa'n na theh ding uh chi ahon pe ding a, ahon hihpungsak ding a, na diktatna gahte uh leng ahon hihpungsak ding. 11Thilphalna chiteng koute ziak a Pathian kiang a kipahthu genna pen nei ding a, bangkim a hihhauh a om in, 12hiai sepsakna nna in misiangthoute taksapna awngte ahuksak kia ahi kei a, Pathian kiang a kipahthu genna tampi in leng aluanglet lai ahi. 13Hiai nasepna a etkhiak a om in Khrist tanchinhoih lam a na thugin uh na zuihdan uleh amau a ding leh mi tengteng a dia thilpiak a na thilphaldan un Pathian na hih thupi ding uh ahi. 14Amau ngei in leng na tung ua Pathian hehpihna thupi mahmah ziak in, nou a dia thumsak kawm in ahon ngai mahmah uhi. 15Athilpiak gen zoh vual louh ziak in Pathian kiang ah kipahthu om hen.
Currently Selected:
2 KORINTHTE 9: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
