2 KORINTHTE 10
10
Paul In Anasep Agum
1Huan kei Paul, na lak ua na mitmuh ua thunuailuttak a om a, na kiang ua om louh chiang a noumau lam a khauh in Khrist lungnemna leh nunnemna in ka hon ngen ahi. 2Ahi, na kiang ua ka om chiang in khenkhat sa bang a om a hon septe tung a hangsantak a om ka tup ngamna bang in, ka hon khauhkhum akullouhna ding in ka hon ngen ahi. 3Sa ah om mah leng sa kidou bang in i dou kei ua, 4eite kigalthopnate zaw sa leng ahi kei a, kulhpi kiptak phelna ding a Pathian ziak a thilhihtheitak galvan ahi zaw hi. 5Lung a gel pansante leh thil sang chiteng Pathian theihna dal ding a sangtak a bawlte i phuk zel; ngaihtuahna chiteng Khrist thumanna sikha a pi in; 6na thumandan uh hihkim a a-om chiang in, thumanlouhna tengteng phu la ding nangawn a leng mansa in ka om uhi.
7Noute'n polam muh theih thilte kia en na hi uh maw? Kuapeuh in Khrist a hi a kimuang ahihleh amah kingaihtuah nawn hen, amah Khrist a ahih bang in, koute leng ka hi sem uhi. 8Ka thuneihna uh nou hihsiatna ding ahi kei a, noumau bawlhoih zawkna ding a Toupa'n ahon piak suang mah leng ka zahlak kei ding uhi. 9Ka laikhakte a nou hon hihlau tum bang a ka latlouhna ding in huai ka chi ahi. 10“Alaikhakte zaw agik in akhauh a, himahleh ataksa kilatdan mizawngkhalpi ahi a, apau leng ahawmthohhuai,” achi uhi. 11Ka om louh chiang ua ka laikhakte ua ka thugelh uleh, huai lai a na kiang ua ka om chiang ua ka hih ding uh akibatlouhna a-om kei chih huchibang mite'n theisiam uhen.
12Khenkhat amau kiphatte lak ah ka kisimkhawm ngam kei ua, amau toh leng ka kitehpih ngam sam kei uhi. Himahleh amau zaw amau leh amau kiteh in amau leh amau kitehpih in lungsim nei lou in a-om uhi. 13Kou zaw Pathian hon tehna val in ka ki-uangsak kei ding ua, mohpuakna ahon piak bang zel in ka ki-uangsak zaw ding uhi, noumau ngei leng huai mohpuakna in hon huamkhak na hi uhi. 14Ka thuneih phaklouhna ding tantan uh hong uk hilou in, Khrist tanchinhoih gen in na khua uah ka hong pai zaw uhi. 15Koute ka hihna pel ua kiphat hiam, midang sepgimnate kisuanpih ka hi kei uh; na ginna uh akhandan bang zel in, na lak ua ka nasepna uh nakpitak a hihlet in omleh chih lametna ka nei zaw uhi, 16huchi in midang nasepsa suang hilou a, nou khen lam gamte tanpha a tanchinhoih ka gentheihna ding un. 17Himahleh, “Asuang peuh in Toupa suang hen,” 18Amah kiphat mi in phat aloh ngal kei a, Toupa'n agen hoih mi in phat aloh zaw ahi.
Currently Selected:
2 KORINTHTE 10: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
