2 KORINTHTE 8
8
Jerusalem Gentheite A Dia Thilpiak
1Huan unaute aw, Masidonia gam a saptuam pawlte lak a Pathian hehpihna piak pen ka hon theisak ding uhi. 2Huchi a haksa thuakna ze-etna thupi a, akipahna uh kiching zou leh nakpi a genthei hinapi, amau lam a athilphalna thupi un huaite khupzou ahihdan bang. 3Aneih bang un, ahi, aneih sang ua thupi in leng, amau ut thu un apia uh chih theihpih ka hi; 4hiai hehpihna leh misiangthoute nasepsakna thu a nakpitak a hon ngen ngutngut in. 5Huan hiai leng ka lamet bang uh hilou, Toupa kiang ah akipekhe masa phot ua, huan Pathian deihna bang in koute kiang ah ahong kipekhia uhi. 6Huchi in tuma a apatsa, hiai hehpihna leng noumau a hihkim lai ding in Titas ka ngen uhi. 7Huchi in bangkim ginna, thugen siamna, theihna, phattuamngaihna tengteng, na hon itna uh na hauh bang un, huai hehpihna leng na hauhtheihna ding un thanop suah un.
8Thupia bang in ka gen kei a, midang phattuamngaihna in na itna uh gildan leng chian ding in ka gen ahi zaw hi. 9I Toupa Jesu Khrist hehpihna, agentheihna ziak a na hong hauhtheihna ding un hau mahleh noumau ziak ngeingei a ahong gentheih takdan, na thei uhi.
10Huchi in huai ah ka ngaihdan bang ahia ka gen hi; kum khat paita a na hih pat kia uh leng hilou, hih ding a na na lunggulh uh tu in buchingsakta le uchin nou a ding in ahoihpen ahi. 11Huchi in hihpichin ding a kimanna a-om bang in, na neih bang zel ua tangtunna leng a-omtheihna ding in, tu'n ah zaw hihtangtungta un. 12Kimanna pen a-om nak photleh mi aneih louhpi hilou in, aneih bang zel a apiak kipahpih tuak ahi.
13Midang agim louh ua, nou na gimna ding un ka chi kei hi. 14Kibatlualna ding in, na hauhna uh tulai in ataksap awnghukna ahong hih a, ahauhna uh leng na taksap awnghukna uh ahong hih sam theihna ding in ka chi ahi zaw, huchi in kibatlualna ahong om thei ding hi.
15“Akhawm tam in aval in
anei kei a, akhawm tawm in leng atasam tuan kei,” chih gelh bang in.
Titas Leh Alawmte
16Huan ke'n nou ka hon awlmoh bang a awlmohna lungtang Titas kiang a pepa Pathian kiang ah kipahthu om hen. 17Ka ngetna uh ahon sansak a; himahleh ka nget ziak kia uh hilou in, ama phatuamngaihna in, amah ut thu in na kiang ua hoh dia pawt ding in akisa hi. 18Unaupa khat toh amah ka hon sawl uhi. Huai unaupa asaptuam un tanchinhoih lam a aphatna uh saptuam pawl tengteng ah athangsuak hi. 19Huchi lel leng ahi kei, hiai hehpihna thawnpiak po ding a kou toh zin vialvial ding a saptuam telkhiak ahi a, Toupa thupina ding in hiai thilthawnpiak ka hawm ua, midangte huh na kithalawpna uh ensak ding in leng ka hawm uhi.
20Hiai thilpiak ka hawmna lam uah kuamah in ahon demlouhna ding un ka pilvang uhi. 21Toupa ngaihdan kia in hilou in, mihing ngaihdan a leng thil kilawm ka ngaihtuah khol zel uhi.
22Huan akiang uah ka unaupa uh ka sawl ua, amah thil tampitak ah phatuamngaitak ahi chih tamveipi ka theichianta uhi, tu khol a houh nou ahon taksan mahmah ziak in phatuam angai nawn sem hi. 23Titas ahihleh, ka lawm leh noumau lam a ka naseppih ahi a; huan, ka unaute uh ahihleh, saptuam pawlte palai, Khrist thupina ahi uhi. 24Huaiziak in na it uh chih theihna leh ka hon suanna uh theihtelna saptuam pawlte ma ah akiang uah langsak un.
Currently Selected:
2 KORINTHTE 8: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
