2 KORINTHTE 7
7
Titas Hong Tunna A Paul Kipahna
1Huchi in deihtakte aw, huai thuchiamte i neih ziak un, sa leh kha buahna tengteng a kipan ei leh ei i kisiangsak ding uh, Pathian laudan siam kawm a sianthouna hihbukim in.
2Na lungtang uah mun hon awn un; kua tung mah ah ka khial kei ua, kuamah ka hihse kei ua, kuamah ka khem sam kei uh. 3Kuamah siam louh tansak sawm a hiai thu gen ka hi kei; sih leh sihkhawm a, dam leh damkhawm ding in ka lungtang uah noute ka hon vom uh chih tuma zek in ka genta hi. 4Nou lam ah zaw ka pau ngamdan athupi a, ka hon suandan athupi hi; khamuanna in ka dim a, ka haksatna tengteng uah nuamsa in ka dimlet hi.
5Masidonia gam ka tun un leng ka sa un muanna himhim anei tuan kei a, khat lam khat lam ah hihgim in ka om zawta ua; polam kisualnate a-om a; sunglam launate leng a-om hi. 6Himahleh, lungngai a omte khamuanpa, Pathian in, Titas ahong tunna in hon khamuan a; 7ahong tunna kia in ahi kei, na lungkhamdante uh, na kahdante uh, ka tung a na phattuamngaihdante uh hon hilh a, noumau a akhamuanna mah in leng ahon khamuanta ahi; huchi in ka kipak nawn sem hi.
8Ka laikhak in hon hihlungkham mah leng, ka kisik kei hi; atung in ahihleh ka kisik a, huai laikhak in nou ahon hihlungkham chih ka theih ziak in; himahleh sawt lou kal kia ahi. 9Tu'n zaw ka kipak ahi, hihlungkham a na om ziak uh ahi kei a, kisikna ding a na lungkham ziak un ahi zaw hi. Koumau ziak a bangmah na tanlouhna ding un Pathian deihlam bang a hihlungkham in na om uhi. 10Pathian deihlam a lungkhamna in hotdamna ding in, kisikna abawl a, kisikhuai thil atun kei; khovel lungkhamna in bel sihna atun zaw hi. 11En mah un, Pathian deihlam a lungkhamna in bangchibang chihtakna, bangchibang kihahsiang nopna, bangchibang ki-awilouhna, bangchibang patauhna, bangchibang lunggulhna, bangchibang phattuamngaihna, bangchibang gawtna ahia nou a dia ahon tut tak. Bangkim ah huai thu ah na siang uh chih na kihihlangta uhi.
12Huchi in na kiang uah gelh mah leng, agilou hihpa ziak in ka gelh kei a, agilou thuakpa ziak in leng ka gelh sam kei, ka tung ua na phattuam ngaihdan uh Pathian mitmuh a na kiang ua theihsak a a-omtheihna ding in ka gelh ahi zaw hi. 13Huaiziak in khamuan in ka omta him ua; koumau khamuanna kia lou ah leng, Titas kipahna ziak in ka kipak nawn sem ua, noute tengteng in alungsim na hihhalhsak tak ziak un. 14Akiang ah bang lam peuh ah leng noumau hon suang mah le ung, ka zahlak ngal kei ua, zahlak nak sang in bangkim, na kiang ua thutak tak a ka gen zel bang un, Titas ma a ka hon suan uh thutak tak ahong hita ngei hi. 15Huan na vek ua athu na mandante uh, lau leh ling kawm a amah na kipahpihdante uh theigige in, alainatna noumau lam ah alian nawn semta ahi. 16Thil bangkim ah na tung ua ka muan ziak in ka kipak ahi.
Currently Selected:
2 KORINTHTE 7: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
