2 KORINTHTE 6
6
1Pathian hehpihna phattuampih lou a na tanlouhna ding un, amah seppih koute'n ka hon ngen petmah uhi.
2“Hun kipahhuai ah ka hon ngaikhia a,
hotdamna ni ah ka hon panpih,” achi ngal a.
Ngai un, tu hun kipahuai ahi a; ngai in, tu hotdamna ni ahi! 3Ka nasepna uh dem a a-omlouhna ding in bang lam peuh ah kuamah pukloh ding himhim ka bawl kei uhi. 4Pathian nasemte bang in bangkim ah mi mit tung in ka om zaw zel ua, nakpi a kuhkalna ah, gentheihna ah, taksapnate ah, lunggimnate ah; 5vuaknate ah, hentaknate ah, mipihon buainate ah, sepgimnate ah, zan ihmutmohnate ah leh gilkialna ah; 6sianthouna in, theihna in, kuhkalna in, migitna in, Kha Siangthou in leh 7thutak thu in, Pathian thilhihtheihna in; taklam leh veilam a diktatna galvante zang in; 8pahtawina ah leh pahtawilouhna ah, min gensiat leh min genhoihna ah leng; 9midiktat hi ngal in mikhemte bang a bawl in ka om ua; minthangtak hi ngal in theih tham louh bang in, si dek phial a vuak a om a, hihlup louh in, ngai dih ua, ka hing ua; 10lungkhamtak bang a om in, lah kipak gige ngal in; zawngtak bang a om in, lah bangkim a midangte hausa a bawl in, bangmah nei lou bang in, lah thil bangkim nei hi ngal in.
Piangthakte Itna Ngetna
11Korinthte aw, koute'n zalentak in ka gen ua, ka lungtang uh zatak in akihong hi. 12Noute a ding in phal louh bangmah ka nei kei ua, nou bel na thil deihlam uah phal louh tan na nei uhi. 13Huchi in ka hon piak bangbang hon pethuk sam ding in (tate kiang a gen bang in ka gen ahi), nou leng na lungtangte uh zasak sam un. 14Ginglou mite toh kituakloupi a hakkol pokhawm in om kei un; diktatlouhna leh diktatna in bang ahia kikopna aneih uh? Ahihkeileh, mial leh vak in bang ahia kithuahna aneih uh? 15Belial leh Khrist in bang ahia kituahna aneih uh? Ahihkeileh, gingloumi leh gingtami'n bang ahia tankhawm aneih uh? 16Milimte leh Pathian tempul in leng bang ahia kituahna aneih uh? Eite zaw Pathian hing tempul i hi ngal ua; Pathian in,
“Amaute ah ka teng dia,
amau lak ah leng ka khosa ding;
huan a Pathian uh ka hi dia,
amau leng ka mite ahi ding uh,
achih bang in.
17Huaiziak in alak ua kipan in hong pawt unla,
atuam in om un, thilsiang lou himhim khoih kei un,
Toupa'n achi, huchi in
ka hon kipahpih dia,
18noute a ding in na Pa uh ka hi dia,
noute leng kei a ding in tanute leh tapate na hi ding uh,
Toupa Bangkim hihthei in achi,” chi in.
Currently Selected:
2 KORINTHTE 6: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
