2 KORINTHTE 5
5
1I omna lei inn, hiai puanin pen hihsiat in om mahleh van ah inn, khut a lam louh, tangtawn a om ding, Pathian a kipan inn kip i nei uh chih i thei uhi. 2Van a kipan i omna ding silhthuah ut mahmah in hiai puanin ah thum chihtak in i thum gige uhi. 3Huchibang a silh in om leng vuaktang in i om kei ding uhi. 4Eite hiai puanin a i om sung in gik pua in thum petmah in i thum ngal ua, silh lou a om i ut ziak ahi kei a, silhthuah a om i ut ziak ahi zaw, sithei pen hinna valh a a-om theih zawkna ding in. 5Huan huai mahmah ding a hon sutuahpa khamna Kha hon pepa Pathian ahi.
6Huchi in pumpi a i om lai teng in Toupa kiang ah i om nai kei chih thei in, muangtak in i om gige uhi. 7Muthei a pai lou in, ginna in i pai zaw zel uhi. 8Muangtak in i om, huan pumpi a om lou a Toupa kiang a om i utzaw hi. 9Huaiziak in om in om keita lehang leng, amah kipahpih lam mi hih i tum tinten ahi. 10Michih in pumpi a thilhihte asia-apha in, i hih bangbang a i muh chiat theihna ding in, Khrist thukhenna tutphah ma ah hihlat in i om vek ding uhi.
Khrist Itna Thahatna
11Huchi in Toupa kihtakdan thei in mihingte ka hanthawn zel uhi, koute hihna Pathian kiang ah latsak a om bang in, na sia-le-pha theihna uah leng latsak a ka om uh ka lamen uhi. 12Na kiang uah ka kigenhoih nawn uh ahi kei a, lungtang hilou a, dinmun lel suangte bang ahi hiam dawnna ding na neihtheihna ding un kou lam ah suantheihna hon bawl in ka gen zaw uhi. 13Ka hai uleh Pathian a ding in ahi a; ka pil uleh noumau a ding in ahi. 14Khrist itna in ahon sawl teitei ahi; hichi in ka ngaihtuah uhi; mi tengteng sih sik in mi khat asi a, huaiziak in mi tengteng asi uhi. 15Mi tengteng sih sik a Khrist asihna pen ahingte leng amau a dia ahin nawn louh ua, asih sik ua si a thounawn a ding a ahin zawkna ding un.
16Huchi ahih ziak in tuban kou zaw salam ah kuamah ka thei nawnta kei ding uh; salam ah Khrist na theita mah le ung leng; tu'n zaw ka theita kei uhi. 17Huchi ahih ziak in, kuapeuh Khrist a a-omleh thilsiam thak ahong hi a; thil luite amangta a, ngai un, ahong thakta hi. 18Himahleh bangkim Pathian kiang a kipan a pawt ahi a; ama'n Khrist ziak in amah toh kituak in hon bawl a, kituahna nasepna ahon pia hi. 19Huchi in Pathian in Khrist ah khovel amah toh kituak nawn in abawl a, atatleknate uh tatlekna a sehsak lou in, kituah nawnna thu hon kemsak ahi.
Khrist Palaite Thukhah
20Huaiziak in koute Khrist palai nasemte ka hi ua, Pathian in koute tungtawn in ahon ngen ahi. Pathian toh kituakta un aw chi in Khrist sik in ka hon ngen uhi. 21Amah a Pathian diktatna i hong hihtheihna ding in khelhna himhim thei lou amah Pathian in eite ziak in khelhna in abawl hi.
Currently Selected:
2 KORINTHTE 5: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
