2 KORINTHTE 4
4
Leibel Ah Vangou Kem
1Huaiziak in Pathian zahngaihna a hiai nasepna mu in ka lungke kei uhi. 2Thil zumhuai kiselte ka pampaih zawta ua, khemna thu ka zang kei ua, Pathian thu tuh mi khemna ding in ka zang kei ua, thutak theisak in Pathian mitmuh in michih sia-le-pha theihna mit ka tungsak uhi. 3Himahleh ka tanchinhoih uh khuh a a-omleh, mangthang lelte ah ahi khuh a a-om. 4Pathian batpih Khrist leh athupidan tanchinhoih vak in amau asalhvak theihlouhna ding in, huaite ah hiai khovel pathian in agingtaloute lungsim asukmialsakta hi. 5Koumau thu ka gen kei ua, Khrist Jesu Toupa thu ka gen zaw uhi, koute leng Jesu ziak in sikha ka hih uh leng ka gen zel uhi. 6Jesu Khrist mel ah Pathian thupidan theihna vak hon pe ding in, “Mial a kipan vak avakkhe ding,” chipa Pathian in i lungtangte asalvakta ngal hi.
7Himahleh thilhihtheihna thupina koute a hilou a, Pathian a ahihtheih zawkna ding in huai gou tuh leibel ah ka kem uhi.
Khrist A Pathian Hatna
8Alanglang ah nehden in ka om ua, himahleh ning kitel in ka om tuan kei uh; mangbang in ka om ua himahleh ka lungke tuan kei uhi. 9Sawi in ka om ua, himahleh taisan in ka om kei uh; khetpuk in ka om ua, himahleh hihmang in ka om kei uh. 10Ka pumpi uah chik lai peuh in leng Jesu sihna ka pu zel ua, Jesu hinna leng ka pumpi ua alattheihna ding in. 11Koute hingdam a omlaite Jesu ziak a si ding a matsak in ka om gige ua Jesu hinna leng ka sa sithei ua a lattheihna ding in. 12Huchi in koute ah sihna in asem gige a, nou ah bel hinna in asem gige hi.
13Himahleh, “Ka ging a, huaiziak in thu ka gen ahi,” chih gelhpa ginna lungsim ngei pu in, kou leng ka ging ua, thu leng ka gen uhi. 14Toupa Jesu kaithoupa'n koute leng Jesu ah hon kaithou sam ding a, noumau toh ama omna mun ah hon dingsak ding chih thei in. 15Bangkim noumau hoihna ding ahi ngal a, hehpihna mi tamzaw ziak a hihkhan a om a, Pathian thupina ding a kipahthu genna nakpitak a akhansak sem theihna ding in.
Pumpi Khat A Hinna Nih
16Huai thu ziak in ka bah kei uhi; i polam mihing zawngkhal hiaihiai mahleh, i sunglam mihing pen niteng in bawl thak zel in a-om zaw ahi. 17Ka gimthuakna neukha uh tu mitphiat kal sung kia a om ding in, thupina thupitak tangtawn a ding in ahon bawlsak hulhul ahi. 18Thil muhtheihte en lou in, thil muh theihlouhte ka en zaw uhi; thil muhtheihte zaw sawt lou kal a ding ahi a, thil muh theihlouhte bel tangtawn a ding ahi zaw hi.
Currently Selected:
2 KORINTHTE 4: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
