2 KORINTHTE 3
3
Paul Nasepna Apiangthakte
1Koumau kigenhoih pan nawn dek ka hi uhia? Ahihkeileh, na kiang ua piak ding hiam aw na kiang ua kipan hiam genhoihna lai, mi khenkhat a dia akiphatmoh bang in koute a ding in akiphamoh sam ding a hia? 2Noute ka lai uh, na lungtang ua gelh, mi tengteng theih leh sim na hi uhi. 3Khrist lai, kou hon gelhsak laitui a gelh hilou, Pathian hing Kha gelh hi zaw, suangpek a gelh hilou, sa lungtang pek a gelh hi zaw na hi uh chih chiantak in na taklangta uhi.
4Huan Pathian lam ah huchibang muanna Khrist vang in ka nei uhi. 5Bangpeuh koumau a kipan a pawt ahi chi a ngaihsun ding in koumau kia in ka chin uh ka chi kei ua; ka chintheihna uh Pathian kiang a kipan ahi zaw. 6Amah mah in thukhun thak nasemte hi ding in hon chingsak a; alai thu gelh lel nasemte ding hilou in, a Kha nasemte ding in ahi zaw hi; laithu gelh lel in zaw ahihlum nak a, Kha in bel ahihhing hi.
Gospel Leh Dan Thupina Tehna
7Mosi mel avak ziak in Israel suante'n amel a-en sawt thei kei ua, huai thupina amang hiaihiai a; sihna nasepna suang a laimal gelh bawn, huchi tel a thupi a atunleh, 8Kha nasepna pen bangchi phet a thupi in atung diam aw? 9Siam louh tansakna nasepna bawn athupileh diktatna nasepna athupizaw mahmah ding ahi. 10Hih thupi a omsa in hiai ah zaw thupina himhim aneita ngal kei a, thupina thupizaw in akhuh tak ziak in. 11Mangta hiaihiai bawn thupi a atunleh om gige ding thupi atuam in a-om zaw mahmah ding ahi.
12Huan huchibang lametna ka neih ziak un hangsantak in gen ngamna ka nei uhi. 13Mosi hih bang in ka hih kei ua, ama'n zaw thupina mang hiaihiai tawpna Israel suante'n a-et sawt louhna ding un maikhuhna in amai akhuh a; 14alungsim uh bel hihkhauh in a-om a; tuni tanpha in Thukhun Lui asim un khuhna ngeina hawk louh in a-om gige ngal a, huai khuhna Khrist ah hihmang in a-omta hi. 15Himahleh tuni tanpha in Mosi Laibu asim peuh chiang un alungtang uah khuhna a-om hi. 16Himahleh alungtang uh Toupa lam angat peuh chiang un khuhna lakmang ahita ding hi. 17Huan Toupa tuh huai Kha ahi a, Toupa Kha omna peuh ah noplenna a-om zel hi. 18Huchi in eite zaw i vek un mai khuh lou in limlang bang a Toupa thupina tangsawnsak zel in, amah kibatpih ngeingei a om ding in hihlamdan in i om zel uhi; hiai Toupa Kha ngei a kipan i muh ahi.
Currently Selected:
2 KORINTHTE 3: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
