2 KORINTHTE 2
2
1Himahleh keimah lam thu ah zaw hiai ka na tum tintenta ahi, lungkhamna dia na kiang ua hong nawnta lou ding in. 2Ke'n ka hon hihlungkhamleh ka hihlungkhampen mah lou in kua'n ahia kei hon hihkipak ding? 3Huchi in huai mahmah ka gelh ahi, huchi lou in zaw ka hong in ka kipahna dingte lak ah lungkhamna ka mu zaw kha ding a; ka kipahna zaw na vek ua kipahna ahih ka hon gintaksak chiat ngal hi. 4Khitui tampi ke kawm a lungtang a haksa leh lauthawng pipi a ka gelh ahi; hihlungkham a na omna ding uh ahi kei a, na tung ua itna thupizaw sem ka nei chih na theih zawkna ding uh ahi.
Thil Hihkhial Kisik Ngaihdamna
5Himahleh kuapeuh in mite ahihlungkhamleh keimah kia hon hihlungkham ahi kei a, uanggen lua bel hilou in, na vek ua hon hihlungkham chiat ahi zaw hi. 6Huchibang mi a ding in gawtna na piak tak uh akihun ahi. 7Huchi in na ngaidam un na khamuan zawta ding uh ahi, huchi lou in zaw bangchi chi hiam in mi huchibang alungkham luatna in avalhzou kha ding. 8Huaiziak in amah na itna uh hihkip ding in ka hon ngen hi. 9Hiai ziak mah in leng ka gelh ahi, bang peuhmah thu na man uleh, na man louh uh theihchetna ding in. 10Bang lam peuh a mi na ngaihdam uh ke'n leng ka ngaidam hi; ke'n ka ngaihdam khitsa, bangpeuh ka na ngaihdam takleh noumau ziak in Khrist ah ka ngaidamta ahi. 11Huchi lou in zaw Setan in hunlem ala kha ding hi; atup lah i haih ngal kei ua.
Tanchinhoih Gimnamtui
12Huan Khrist tanchinhoih gen ding a Troas ka tun in, Toupa ah kongkhak honsak in ka om hi. 13Himahleh ka unaupa Titas ka muh louh ziak in ka khalam ah zaw tawldamna himhim ka nei tuan kei, huchi in amaute kampha in ka khen a, ka pawt a, Masidonia gam ah ka paita hi. 14Himahleh Khrist vualzohna a hon pi zelpa leh koute a mun chih a amah theihna gimnamtui theisakpa Pathian kiang ah kipahthu om hen. 15Hotdam a omlelte leh mangthang lellelte ah Pathian a ding in Khrist gimnamtui ka hi uhi. 16Pawl khatte a ding in sihna lak ah sihna ding gimnam ka hi ua, pawl khatte ding in hinna lak a hinna ding in gimnam ka hi uh. Hiai bangte a ding in kua ahia chingzou ding? 17Mi tampi in Pathian thu mite khem a sumsinna a azat bang un kou zaw ka zang kei uhi. Pathian sawltak hi zaw in, chihtaktak in Pathian mitmuh in Khrist ah thu ka gen zel uhi.
Currently Selected:
2 KORINTHTE 2: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
