2 KORINTHTE 1
1
Chibai Bukna
1Paul, Pathian deihlam a Khrist Jesu sawltak leh i unaupa Timothi in, Korinth a Pathian saptuam omte kiang leh Akhaia gam tengteng a misiangthou omte kiang ah: 2Pathian i Pa leh Toupa Jesu Khrist kiang a kipan hehpihna leh khamuanna na kiang uah om hen.
Kipahthu Genna
3I Toupa Jesu Khrist' Pa leh Pathian, zahngaihnate' Pa leh khamuanna tengteng Pathian phat in om hen. 4Pathian in koumau hon khamuanna ngei in gimthuakna peuhmah a omte leng ka khamuan sam theihna ding un, ama'n ka gimthuaknate uah ahon khamuan hi. 5Khrist thuaknate tampitak ka tan bang un, Khrist ziak in khamuanna leng tamsem ka tang uhi. 6Himahleh gimthuak a ka om uleh noumau khamuanna ding leh hotdamna ding ahi a; huan khamuan a ka om uleh ka thuak bang uh na thuak chiang ua na theih ua na khamuanna ding uh ahi. 7Huan gimthuakna tang samte na hih bang un, khamuanna tang samte leng na hi uh chih ka theih un, noute a ka lametna uh akip ahi.
8Unaute aw, Asia gam a ka tung ua gimthuakna tung na theih louh uh ka deih kei uhi, huchi a nakpitak a thuakzoh vual louh leh hin leng lamethuai lou khop hial in delhden in ka om uhi. 9Ahi, si dia thupukkhum in ka om ua; huai tuh koumau kimuang lou a misite kaithoupa Pathian ka muan zawkna ding uh ahi. 10Ama'n huchibang sih lauhuai lak ah hon hunkheta a, ahon hunkhe lellel a, hon hunkhe nawn lai ding ahi, chi in amah ka muang uhi. 11Noute'n leng thumna in na hon panpih ding uh ahi, huchi in tampite thumna dawnna vualzawlna piak a ka om chiang un koute ziak in mi tampi in kipahthu agen ding uhi.
Paul Zinna Ding Kikhelna
12Koute suanpen hiai ahi, sapilna ah hilou in, Pathian hehpihna ah hi zaw in sianthouna leh Pathian dikna nei in khovel ah mawltak a ka gamta in, nou lam ah ka gamta hoih nawn sem uh chih ka sia-le-pha theihna un hon theisak hi. 13Na sim theih uleh na theihtheih ding uh lou ngal thudang himhim na kiang uah ka gelh kei uhi; atawp pha in ka thu uh na theihsiam uh ka lamen lai uhi. 14Theihsiamna tan na neih tak bang un, i Toupa Jesu ni chiang in, noute ka hon suan theih bang un nou leng koute na hon suang thei sam ding uhi.
15Huan huai gintakna nei in, na kiang uah hong masa leng ka chi a, kipahna thuah nih na neihtheihna ding un. 16Noumau tawn kawm in Masidonia gam ah pai zel leng la, Masidonia gam a kipan na kiang uah hong kihei nawn in, Judia gam a ka hohna ding ah noumau hong kha le uchin ka chi ahi. 17Huchibang ka ngaihtuah lai in ka lungsim kiplouhdan langsak in hia ka hih? Ahihkeileh, “Ahi, chih leh Ahi kei,” chi tuaktuak ding in, thilhih ka tup nak pen sadan in hia ka tup? 18Himahleh Pathian amuanhuai bang in noumau lam a ka thu uh, Ahi, chih leh Ahi kei, chih ahi kei hi. 19Akoi abang hi hen aw, Pathian Tapa Jesu Khrist thu, kei Silvanas leh Timothi in na lak ua ka gen un, “Ahi leh Ahi kei,” chih ahi sam kei a, amah ah zaw thil tengteng, “Ahi,” chih ahi gige hi. 20Pathian thuchiamte tengteng in amah ah, “Ahi,” chih amu vek hi. Huaiziak in ahi Pathian thupina ding a amah ziak a, “Amen,” ka chih uh. 21Huan Khrist a noumau toh hon hihkippa leh koute hon thaunilhpa, Pathian ahi. 22Amah zaw hon chiamtehpa leh i lungtang a khamna Kha hon pepa leng ahi.
23Himahleh ka kha tung a theihpih ding in Pathian ka sam ahi, noumau hon hawi ding in ahi Korinth a ka hong tak louh zawk. 24Na ginna uh hon thuneihkhum hilou in, na kipahna ding ua nou toh semkhawm ka hi zaw uhi; ginna a na dinkip ziak un.
Currently Selected:
2 KORINTHTE 1: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
