2 KORINTHTE 12
12
Paul Mengmuhna Leh Kilakna
1Ka ki-uangsak lai ding hi. Ka phattuampih ding a-om kei na a, Toupa kiang a kipan mengmuhna leh kilakna thu ka genzom lai ding hi. 2Khrist a mi khat ka thei; huai mi tuh kum sawm-le-li ahita a, pumpi in hia a-om ka thei kei, pumpi lou in hia a-om ka thei sam kei; Pathian in athei, van thumna hial ah laktouh in a-om hi. 3Huai mi mahmah, pumpi in hia a-om, pumpi lou in hia ka thei kei; Pathian in athei hi; 4paradis a laktouh a a-omdan, thu genkhiak vual louh, mihing gensiangloute aza chih ka thei hi. 5Mi huchibang ahihleh ka suang ding; himahleh ka hatlouhna lou zaw keimah ka kisuang kei ding hi. 6Suan ut mah leng mihai ka hi kei ding, thutak tak ka gen dek ngal a; himahleh ka kidek ding, huchi lou in zaw kuapeuh in hon muh bang uleh ka lak a thu azak sang un hon ngai thupizaw kha ding uhi.
7Huan kilakna thupi mahmah ziak a ka kingaihlet luatlouhna ding in ka sa ah ling hon pia ahi, Setan sawltak, khut thak nuhna dia hon zang ding ngei; huchi lou in zaw ka kingailian kha ding hi. 8Huai thil tungtang thu ah hon awngsut theihna ding in Toupa thumvei ka ngen hi. 9Huan ama'n ka kiang ah, “Ka hehpihna nang a ding in ahun hi, hatlouhna ah ahi ka thilhihtheihna hihkim a a-om,” achi hi. Huchi in Khrist thilhihtheihna ka tung a a-omtheihna ding in kipaktak in ka hatlouhnate ka suang zaw ding hi. 10Huaiziak in Khrist ziak a hatlouhna ah, liamna ah, taksapna ah, sawina ah, lungngaihna ah ka kipak zel hi; ka hat louh peuhpeuh chiang in ahi ka hat zawk zel.
Paul In Korinthte A-awlmoh
11Hai ka na hita; nou hai lou thei lou in na hon bawl ua ahi; bangmah hi kei mah leng, noumau na hon pahtawi ding uh ka hi, bang lam peuh ah leng sawltaklian thuneipente ka pha lou kei hi. 12Ka sawltaklian hih chiamtehnate kuhkalna chiteng toh chiamtehnate, thillamdangte, nasep thupite in na lak uah hih ahi taktak hi. 13Bang lam ah ahia, saptuam pawl dangte sang a niamzaw a bawl a na omna uh? Keimah ngeingei in ka hon hihbuailouhna lam thu ah ahih kei ngalleh. Huai diklouhna ah hon ngaidam un.
14Ngai un, hiai na kiang ua hong hoh ding ka sawm athumveina ahi; noute ka hon hihbuai kei ding, na thilneihte uh hilou in noumau hon deih ka hi zaw hi; tate'n nu leh pate a ding in akholkhawmsak ding uh ahi kei a, nu leh pate'n tate ding in akholkhawmsak zaw ding uh ahi. 15Huan kei zaw na kha ua ding in kipaktak in ka kizangbei ding a, ka kizangbei vek lai ding hi. Akan-aval a nou ka hon it ziak in ke'n noute itna tawmzaw muhna in ka nei ahi maw?
16Himahleh kei mahmah in ka hon hihbuailouhna ah kei lepchiahpil leh khemna a noute hon man na sa ua hiam. 17Na kiang ua ka misawl kuahiamte zang in nou ka hon hamphatpih ngei a hia? 18Noute kiang a hong pai ding in Titas ka ngen a, amah toh unaupa ka hon sawl hi. Titas in nou ahon hamphatpih himhim hia? Kha kibang a gamtakhawm ka hi kei ua hia? Khap kibang a pai ka hi kei ua hia?
19Noumau kiang a kou leh kou kihu na hon sa ua hia? Khrist ah Pathian mitmuh in ahi thu ka gen uh. Himahleh deihtakte aw, bangkim noumau bawlhoihna ding ahi. 20Ka hong pai chiang in bangchi hiam a ka lamet bang a ka hon muh keileh kei deih bang in na hon mu kei kha ding uh chih leh bangchi hiam in kitainate, kihazatnate, hehnate, kilangkhennate, kigennate, kihuaukhumnate, kingaihlet luatnate, buainate a om in ka hon mu kha ding chih ka lau hi. 21Na kiang ua ka hong nawn chiang in ka Pathian in na lak uah hon hih zahlak in thil hihkhialte leh thilsiang lou hihte, kingaite, huk ching a kisik tuan lou, mi tampite ka kahkhum kha ding chih ka lau hi.
Currently Selected:
2 KORINTHTE 12: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
