2 KORINTHTE 11
11
Paul Leh Sawltak Takloute
1Ka hai deuhna uah noute'n Pathian ah na hon thuak theih uh ka ut hi. Ahi, thuak leng na hon thuak theita uhi! 2Pathian hazatna, thikthuse khop in ahi nou ka hon hazat; Khrist kiang a nungak siangthou bang a ka hon piaktheihna ding in, pasal khat ka hon hawisak hi. 3Himahleh gul in azuau pil a Evi akhem bang in, Khrist lam a takna leh sianthouna a kipan bangchi hiam in na lungsim uh ahihse kha ding, chih ka lauthawng hi. 4Khattei hong pai a Jesu dang, athu ka gen ngei louh uh, agen a, kha lamdang na muh ngei louh uh leh tanchinhoih lamdang na san ngei louh uh, na pom pah un kipe baih lua na himah kei ding ua hia!
5Hiai Sawltaklian thuneipen na chihte uh sang in bang lam peuh ah niamzawkna nei in ka kigingta kei hi. 6Thugen lam ah pau zatsiam kei mah leng theihna ah zaw huchibang ka hi kei uhi; huai noute kiang ah bang lam peuh leh thil tengteng ah ka kilangsak uhi.
7Ahihkeileh, Pathian tanchinhoih athawn lel a ka hon hilh ziak a tawisan a na omtheihna ding ua ka kihihniam in thil ka hihkhial a hia? 8Na nna uh ka septheihna ding in midangte a kipan huhna la in, saptuam pawl dangte ka lok ahi. 9Huan na kiang ua ka om a, ka taksap lai in, kuamah ka hon hihbuai kei a; unau Masidonia gam a kipan a hong paite'n ka taksap awng ahong huksak ngal ua; bangkim ah noumau hihbuai lou in ka kibawl bang in, ka kibawl zel lai ding hi. 10Khrist thutak kei mah a a-om bang in, hiai ka kisuanna zaw Akhaia gam lam ah hihdaih in a-om kei ding. 11Bangziak in? K'on it louh ziak hia? Pathian in ka hon it lam athei hi.
12Huan anasep uh kisaktheihpih a, kou sep bangbang a sem kichite kichihna ka bulkalh theihna ding in ka sep tuh ka sem zom zel ding hi. 13Mi huchibangte zaw Khrist sawltak akibawltawm a, sawltak takloute, nasemmi, mikhem hatte ahi uhi. 14Huai ahihleh alamdang kei; Setan hial leng vak sawltak in akibawltawm nak ahi. 15Huaiziak in anasemte leng diktatna nasemmi in kibawltawm mah le uh thillamdang ahi kei; huaite tawpna zaw athilhih bang zel un ahi ding hi.
Sawltak Hihna Ziak A Paul Thuakna
16Ka chi nawn ahi, kuamah in mihai in hon sep kei uhen; himahleh na hon seh vanglak uleh, ke'n leng neuchik bek a ka kisaktheih sam theihna ding in mihai bangtak in hon pom un. 17Ka gen zaw Toupa thuneihna in ka gen kei a, ka kisaktheihna mihai bangtak in ka gen zaw ahi. 18Mi tampite'n khovel thilte akisaktheihpih ziak un kei leng ka hong kisathei sam ding hi. 19Nou bel mipil na hih ziak un mihaite lungkimtak in na thuakzou zel uhi. 20Mi sal a hon bawlte, hon negaite, nuamtak hon sa a na tung ua kiliansak leh na mai ua hon bengte na thuak thei zel ngal ua. 21Kisitna dan in ka gen ahi, huchi dia zaw hat lou lua mah kei ve ua! 22Amaute Hebru mi ahi uhia? Kei leng ka hi. Israel mi ahi uhia? Kei leng ka hi. Abraham suante ahi uhia? Kei leng ka hi. 23Khrist nasemte ahi uhia? Mihai bang in gen taleng, ka hi sem; sepgimna ah thupi sem in, suangkul tanna ah bang thupi sem in, vuakna ah bang akan-aval in, sih lauhuaina tamveipi ka tuak hi. 24Judate lak ah vuakna khatvei a sawmli ching lou ngavei ka tuak hi. 25Thumvei chiang a khet in ka om a, khatvei suang a den in ka om hi, thumvei longsiatna ka tuak a, zan khat leh ni khat tuipi ah taihmang in ka om hi. 26Khualzinna ah tamveipi, luite lak ah lauhuai, suamhatte lak ah lauhuai, ka chipihte lak ah lauhuai, Zentelte lak ah lauhuai, khopi ah lauhuai, gamdai ah lauhuai, tuipi ah lauhuai, unau takloute lak ah lauhuai; 27septawlna leh sepgimna, ihmutmohna ah tamveipi, gilkial leh dangtakna ah, an ngawlna ah tamveipi, khosik leh vuaktang a omnate. 28Huan hiaite ban a kigen lou saptuam pawl tengteng ka ngaihtuahna niteng a hon delh gige leng a-om hi. 29Kua ahia zawngkhal a om a, ke'n ka zawnkhalpih louh? Kua ahia khelhna a puksia a, ke'n ka lunggimpih louh?
30Suang ding ka hih vanglakleh ka hatlouhna lam thilte ahi ka suan ding. 31Tangtawn a phat tak, Toupa Jesu' Pathian leh Pa in zuau ka genlouhdan athei hi. 32Damaskas ah kumpipa Aretas nuai a gam-ukpa'n hon man ding in Damaskas khopi avengsak a; 33himahleh kulhbaang tohlet ah bawm in hon khaikhia ua, huchi in akhut a kipan ka suakta hi.
Currently Selected:
2 KORINTHTE 11: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
