1 TIMOTHI 6
6
Sikhate
1Pathian min leh athuhilhna thu gensiat a a-omlouhna ding in sikha hakkol bat peuhmahte'n amau pute bangkim ah zahtak tham in sim uhen. 2Huan gingtami pu a neite'n unau ahih ziak un ngaineu kei uhen, himahleh phattuamna mute leh deihtakte ahih ziak un a-nna uh sepsak semsem uhen. Huai thute hilh inla, hanthawn in.
Sinsaktu Dikloute
3Mi kuapeuh in thuhilhna dang ahilh a, thutak, i Toupa Jesu Khrist thu leh Pathian limsak lam thuhilhna hoih asak keileh, 4amah kisathei ahi a, bangmah thei lou ahi, theih nak sang in kisel leh thukalh lam ah ahai zawta a, huchibang a kipan in, enna, kilaina, gensiatna, 5hoih lou lam a ginna, selhatna asuak nak hi; huchibang mi lungsim sia neite'n thutak nei lou in, Pathian limsak pen punna khattou asa uhi.
Hauhsakna Dik
6Himahleh lungkimna toh kithuah Pathian limsakna tuh punna thupitak ahi. 7Khovel ah bangmah i lutpih kei a, bangmah i pawtpih thei sam kei ding hi. 8Himahleh nek ding leh silh ding nei in, huaite ah i lungkim ding uhi. 9Himahleh, hauhsak tumte khemna, thang, haihuai leh hihse thei duhgawlna tampi ah apuklut nak uhi, huaite'n tuh siatna leh manthatna ah mite ahihtum nak uhi. 10Dangka sum deihtak zaw gilou chiteng bul ahi; khenkhatte'n a-eng ua, ginna apaimangsan ua, amau leh amau lungkhamna tampi in akisunlet tektok uhi.
Mimal Kihilhnate
11Himahleh nang Pathian mipa aw, huai thilte taisan inla, diktatna, Pathian limsakna, ginna, itna, thuaktheihna, kingaihniamnate delh in. 12Ginna kidouna hoih dou inla, tangtawn hinna len tinten in; huai tang ding a sap na hi a; theihpih tamtakte mitmuh in gupna hoih na gumta hi. 13Pathian thil bangkim hihhingpa leh Khrist Jesu, Pontias Pilat mai a gupna hoih gumpa mitmuh in thu ka hon pia hi; 14Toupa Jesu Khrist hong kilat nawn masiah huai thupiak siangthou leh gensiatbei a kem ding in. 15Huai kilakna ama huntak ah phat tuak thuneipa tak kia, kumpipate' Kumpipa, toupate' Toupa'n alak ding ahi. 16Amah kia in sih theihlouhna anei a, vak naih theih vual louh ah a-om a, amah kuamah in amu ngei kei ua, muh leng amu thei sam kei uhi; amah kiang ah tangtawn in thupina leh thilhihtheihna om hen, Amen.
17Hiai khovel a mihausate kisathei lou ding leh hauhna kip lou a muanna nga lou a, thil tengteng kipahna ding a tampi a hon pepa Pathian a nga zaw ding in hilh in. 18Thil hoih ahih ding uh, thil hoih hih a ahauh ding uh, thilphal a asiam ding uh ahi. 19Huchi a amau a ding a gou kikhol a, tunung a dia suangphum hoih phum a, tangtawn hinna taktak aletkip theihna ding un.
20Timothi aw, na kiang a kepsak a om kemhoih in; Pathian zah louh thugen mawkmawk leh kikalhna dikloupi a pilna kichite nungngatsan in; 21mi khenkhat in huai nei kichi in ginna ah apaikhial uhi.
Hehpihna na kiang ah om hen, Amen.
Currently Selected:
1 TIMOTHI 6: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
