1 TIMOTHI 5
5
Gingtute Lam A Timothi Mohpuakna
1Upa deuhte tai ke'nla, pa bang in thuhilh in; tangval deuhte unaupa bang in; 2numei upa deuhte nu bang in; nungak deuhte siangthoutak in sanggamnu bang in thuhilh in.
Meithaite Saidan Ding
3Meithai, meithai taktakte zahtak in. 4Himahleh meithai kuapeuh in tate leh tute aneih uleh huaite'n amau insung ah Pathian limsakna mohpuakna thei masa uhenla, amau nu leh pate uh kem uhen; hiai lah Pathian mitmuh in ahoih in apom tak ngal a. 5Meithai taktak amah kia nutsiat a om in Pathian tung ah lametna anei a, sun leh zan a ngen in athum gige hi. 6Himahleh meithai ama nopsakna sung a kipia zaw, adam lai nangawn in asi ahi. 7Gensiatbei a a-omtheihna ding un huaite thupiak in pia in. 8Himahleh kuapeuh in ama mite a ding angaihtuahsak louh a, ama inkuante khol houh angaihtuahsak keileh ginna azuausan a, gingloumi sang in agilouzaw hi.
9Meithai kum sawmguk chiang nuailam hilou, mi khat zi hisa, 10thil hoih hih lam a mi phatlohta, atate vaktei khin a, mikhualte na zintun khin a, misiangthoute khe na silta a, mangbangte na dawnzang khin a, thil hoih peuhmah thanuamtak a na hih khin ahihleh meithai a gelh theih ahi.
11Himahleh meithai naupang simte zaw gelh ke'n; ataksa lunggulhna un Khrist lam a akipiakna uh athuzoh chiang in pasal neih a-ut nak ua, 12aginna masa uh atawpsan ziak un siam louh tang in a-om nak uhi. 13Huai lou leng thadah in inn teng ah aban pawt nak ua, thadah kia leng hilou in, thu gen louh ding gen in, kamtam leh mite thilhih lai avai hawmsak nak uhi. 14Huchi in meithai naupang simte zaw pasal nei in, tate nei uhenla, insung khosak ngaihtuah le uh, melmapa gensiatna ding lemtang musak kei le uh ka deih hi. 15Meithai khenkhat Setan lam naih in apialkheta uhi. 16Gingtami numei hiam pasal hiam in methaite nei taleh dawnzang hen; saptuamte hihbuai in om kei hen; meithai taktakte adawnzang theihna ding un.
Upate
17Saptuam Upa vaihawm hoihte, abik in thugen leh sinsakna a semgimte aleh nih a hih thupi tuak a seh nawn sem hi uhen. 18Laisiangthou in, “Bawngtal in buh achil lai in amuk gak ke'n,” achi hi. “Nasemmi loh mu tak ahi,” achi nawn hi. 19Saptuam Upa hekna zaw theihpih nih hiam thum hiam kam a lou zaw sang ke'n. 20Mikhialte mi tengteng ma ah taihilh in, midangte'n leng alautheihna ding un.
21Deihsak tuam leh khentuam nei a bangmah hih lou a hiai thute zui ding in Pathian leh Khrist Jesu leh angel teltuamte mitmuh in phatuamngaitak in ka hon theisak hi. 22Kuamah tung ah khut nga pah ke'nla, midang khelhna ah leng kikum pah ke'n; kihihsiangthou gige in.
23Tui kia dawn ke'nla, na gilpi ziak in leh na hat louh nak ziak in uain neu khakha zang zel in.
24Mi khenkhatte khelhna alang gige a, vaihawmna atun nak hi; mi khenkhat khelhnate bel akhonung in ahong kilang hi. 25Huchi mah bang in mi khenkhatte thil hoih hih kilang pah a-om a, akilangloute leng sel theih ahi kei hi.
Currently Selected:
1 TIMOTHI 5: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
