1 TIMOTHI 4
4
Sinsakmi Takloute
1Himahleh tunung chiang in mi khenkhatte'n; pimangna khate leh dawite thuhilhna limsak in, ginna atawpsan ding uh chih Kha in kichiantak in agen hi; huai tuh, 2mizuautheite lepchiahna ziak in ahi; huai mizuautheite amau sia-le-pha theihna ngei a sik am a halkeu bang ahi uhi. 3Kiten akham ua, nek ding ante, thutak thei a gingtate'n kipahthu gen a san ding a Pathian in asiamte, nek louh ding achi uhi. 4Pathian thilsiam chiteng ahoih ngal a, kipahthu gen a san ahih khit nak photleh bangmah deih louh ding ahi kei hi; 5Pathian thu leh thumna a hihsiangthou ahi khinta hi.
Khrist Jesu Nasempa Hoih
6Huaite unaute na sinsakleh Khrist Jesu nasempa hoihtak, ginna leh thuhilhna hoih tutan a na zuih thu a vaklian na hi ding hi. 7Himahleh Pathian zahlouhna leh tangthu bulbal neiloute deih ke'n. Pathian limsak ding in kithuzoh in; 8pumpi kisawizoina aphatuam zek a; Pathian limsakna pen tangtawn in, tua omsa hinna leh hong om nawn ding piak chiamna aneih ziak in thil tengteng ah aphatuam hi. 9Hiai thu amuanhuai in alak tuak mahmah hi. 10Huchi in Pathian hing i muan ziak in i semgim ua, i pang teitei uhi; amah mi tengteng Hondampa ahi a, agingtate Hondampa ahi tuanse hi.
Timothi Hinkhua Leh Asinsakna
11Hiaite thupiak in pia inla, sinsak in. 12Na naupanna kuamah musitsak ke'n; thugen ah, tatdan ah, itna ah, kha ah, ginna leh sianthouna ah, gingtute zuih ding hi zaw in. 13Ka hong pai masiah laisim, hanthawn leh thugin limsak in. 14Nangmah a om thilpiak thugenkholhna a piak, upate khut ngak a Pathian in nang ahon neihsak limsak lou ke'n. 15Mi tengteng kiang a na phattuamna alattheihna ding in huai thilte ah thanuam inla, kizang zou in. 16Nangmah leh na thuhilh ah pilvang in; huai thilte hih in om gige in; huchibang hih in nangmah leh na thuzate na hondam ding hi.
Currently Selected:
1 TIMOTHI 4: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
